› 選擇地區
三藩市
紐約
洛杉磯
其他美國地區
香港 台灣 北美
 
2019年05月16日

【冰說聰明】中美開拖最大贏家 - 青冰

青島啤今年累升60%,近期更加多了一個影子股身份,非常強勁。資料圖片

貿易戰行動升級,侵侵叫住你唔好反擊,但中國一於少理,周一晚在美股開市前出招,道指埋單跌六百點,港股翌日自然裂口急挫,侵侵話加關稅會令美國得益,事實是否如此真係難以證實,但受害者就一定是全球的股民。

股市恐慌,定必會有資金避難所,你睇領展(823)、中電(002)及煤氣(003)在周二全部逆市升,就知啲資金去晒嗰度,即使現時估值偏貴,基金還是焗住將資金停泊在這裏。假如大部份股票都是貿易戰受害者,咁呢幾隻公用股或成最大贏家,冇計呀,地球真的很危險嘛。不過如果侵習握手言和,股市再次進入risk on模式,避難所好大機會變返提款機,始終佢哋係勝在穩而不是高增長。

亂市中要操盤真係唔易,除了現金同公用股,一些消費概念股近日抗跌力甚強,引起青冰的注意。不過所謂的消費概念,都係一些低階嘢,飲飲食食也,去年貿易戰,內地經濟吹淡風,有一個炒作主題就是消費降級,平民及普通的消費品皆跑出。

統一(220)上周公佈首季盈利數字,曾令股價急升逾一成;日清(1475)首季數字亦靚仔,證明即食麵市場唔錯喎;作為一哥的康師傅(322),相信快有好消息。將三隻股的5月走勢拍埋大市度睇,就知道貿易戰對佢哋影響有限。

除了食麵,飲品股今年亦非常強勁,蒙牛(2319)今年累升兩成,爽過吸大麻的維他奶(345),本周被MSCI納入香港指數,今年都升咗三成半,不過最勁還是青島啤(168),累升60%,季績勁固然是主因,近期更多了一個影子股身份,因為全球最大啤酒商百威,欲分拆亞洲業務,並已向港交所遞交上市申請。內地減稅降費,都係為咗刺激內需,所以即使貿易戰日後緩和,消費股仍將是主調,飲飽食醉,悉隨尊便。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載