› 選擇地區
三藩市
紐約
洛杉磯
其他美國地區
香港 台灣 北美
 
2019年05月22日

【收市閒情】沒收熊貓復仇大計 - 千頌C

中美貿易戰拳來拳往,打到中國連熊貓牌都要出。資料圖片

中美貿易戰,特朗普拳拳到肉!中國泱泱大國,又點會容忍被外敵欺壓而唔還手?於是,中國開始出牌了!

第一招,美國加中國2,000億美元貨品關稅25%?偉大嘅中國當然奉陪,一樣加25%!當中方一邊講,「談,可以!打,奉陪!欺,妄想!」,另一邊廂,閂埋門開個會,最後只係加美國600億美元貨算。

好,第二招!哼!你徵我關稅呀搞我華為,我沒收你兩隻熊貓!真係唔係講笑,話說中國過去22年,一直有出租大熊貓「白雲」畀美國聖地牙哥動物園,後來「白雲」六年前仲生咗個仔「小禮物」,兩母子一直喺美國生活得樂也融融。點知去到近日,中方突然唔肯再續約,仲已經沒收兩隻熊貓。喺貿易戰打得如火如荼之時,「白雲」、「小禮物」就被「送中」。情侶分手都會收返送出去嘅嘢啦,更何況中國同美國有親咩?熊貓喎!國寶喎!當然要收返!

第三招!你要打貿易戰,我唔畀你播《權力遊戲》第8季大結局!呢招狠毒呀,本來騰訊(700)自2014年起《GOT》版權,獨家播足咁多年,去到第七季,更加係同美國同步「零時差」播放。點知去到噚日,臨播大結局前一粒鐘,騰訊視頻竟然話延播,仲要唔知幾時有得播。

話說最近中國都開始打媒體愚民戰,原定前日播出新劇《帶着爸爸去留學》,因為有大量美國場景,亦都冇得出街。咁都唔止,近幾日央視黃金時段8點檔,已狂播「抗美神劇」,實行全民洗腦齊抗美!

當中美貿易戰,打到中國連熊貓牌都要出;甚至打到要習近平山長水遠走去江西考察稀土,超級明顯地擺個姿態同全世界講,「你再搞我,我就搞稀土戰,問你死未?」。咁你就知道,中共仲有幾多牌可以打。

不過,真心想講一句,中國延播《權力遊戲》呢隻牌打錯晒,超錯。明明你只要一播結局,播一個爛到反枱嘅結局,所有中國劇迷應該都會嬲到即時大叫「美劇是垃圾!」,咁咪可以令中國上下一心抗美囉!錯晒!

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載