› 選擇地區
三藩市
紐約
洛杉磯
其他美國地區
香港 台灣 北美
 
2019年05月25日

玄學App夥麥玲玲
攻愛情配對

由陳定幫(左)創辦的手機App玄人,與麥玲玲合作開拓玄學配對。

【周末專題】陳定邦在30歲後改名陳定幫,稱「幫幫師傅」。2016年獲天使基金投資400萬元創辦網站及手機App「玄人」,名稱都是朋友林盛斌(Bob)一時口快從日本時裝品牌A Bathing Ape猿人食字食出來。玄人原本構思打造玄學版Openrice,設師傅平台提供即時真人對答,但幾乎半年玩完,索性推出自動化電子命書,竟帶來逾百萬元收入捱過「死亡之年」。打蛇隨棍上,游說玄學家麥玲玲合作開拓玄學配對,希望將玄人帶入Pre-A輪融資階段。
記者:陳家雄

陳定幫9年前掛牌做玄學家,2012年獲邀拍攝《全美超模大賽》,人氣急升,微博粉絲由百多人爆升至40多萬。2015年獲邀到美國哈佛商學院舉辦玄學講座,激發他想建立一套玄學系統收集數據。

「有一本書啟發咗我好多嘢,叫《The Lean Startup》,教我盡快做一個最小可行性產品,有主要幾個功能就得,唔使完美,盡快推出市場畀用家試用,用家覺得唔掂就會鬧你,然後你作出修正。」

師傅平台搞半年無成績

尋找天使投資者時,「同投資者講想做AI算命系統,佢哋問幾錢?幾多時間?我話起碼5年以上,結果佢哋無興趣,因為佢哋要快,要見到產品出嚟。」

IT出身的他一直想在大數據年代收集世人時辰八字,綜合各門派算命方式試圖打造更準確的算命系統,但又要令投資者覺得是門財路,最終與友人腦震盪出玄學版Openrice,甚至獲得天使輪資金共約400萬元。

「最初做法係師傅平台,用戶隨時隨地三更半夜用玄人App問師傅。我哋呢行透明度極低,邊個師傅掂唔掂都係睇意見或朋友轉介。現在想整一個平台,就係好似Openrice,啲人可以睇到人哋對師傅嘅評價,跟住直接喺平台搵到佢。」

電子命書帶來逾百萬收入

玄人網站及手機App推出兩周後獲風險投資機構邀約會面,但卻是獲告知「呢個idea應該行唔通。」結果證實那家風投暫時是對,「師傅平台只得幾十人。我做過市場調查香港有2萬個玄學家,我哋一出都有幾百個師傅用啩!有啲師傅拒絕加入,問我現在有幾多用戶?我話啱啱開始,可能得幾百,咁就無理我啦。」

而且要求玄學家隨傳隨到亦行不通,經常漏覆,為每位師傅聘用客戶服務員會增加成本。師傅又難控制,又有師傅投訴無客。

師傅平台半年無成績,索性背道而馳由人手轉行自動化,推出電子命書竟成為「救命草」,目前累計賣出8,000多本,為公司帶來超過百萬元收入。「命書同坊間有咩唔同?坊間甚少提解決方法。我哋嘅命書,有流年、有終生,會提出建議,如與人相處、衣着打扮等等。」

目前玄人註冊會員約5.6萬,當中15%曾經付費,而命書佔平台收入80%。陳定幫認為:「命書有錢賺,行啱路。但我哋缺點係欠社交功能,咁就要推出玄學配對服務。其實上架以來,使用率最高嘅,全部同愛情有關,7成用戶都問愛情。六成半用家係女性,佢哋會問幾時有男朋友。」

計算旅行夥伴合拍程度

新增的玄學配對服務,用戶輸入出生年月日時後,系統將綜合八字、紫微斗數、星座及生肖等方式計算雙方合拍程度,對象可包括伴侶、生意夥伴、上司下屬,甚至旅行夥伴等,亦會為客戶製作人物關係圖,提供貴人、前世情人、仇家等等。

同時又提供交友服務,程式因應當事人的命盤列出性格、喜好、待人處事態度等等,「甚至會教你點追佢,點同佢相處,佢點對戀人」,但起初對方個人檔案相片朦朧,「唔想啲人咁注重個樣,要大家傾到咁上下,張相先開始清啲。用假相、假戶口就控制唔到,考慮緊綁定facebook、微信,盡力印證用戶嘅真實身份。如果心急想睇對方嘅樣,考慮整個商城賣幣去換取道具如粉刷,捽清佢張相。」

配對服務邀請麥玲玲合作,陳定幫坦言,麥玲玲多年來愛情專家的形象深入民心,而且在內地具名氣,希望透過她打入內地市場。麥玲玲表示,多年來想將玄學電腦化,但過去一直缺乏有玄學基礎的程式編寫員,而幫幫師傅就有齊條件,「事實過去好多富二代、富三代,甚至富一代都會來問吓,呢個女仔旺唔旺我,同我長唔長久。」她續稱,除了配對服務,將會加入改名、面相、搵工、子女升學的玄學查詢。今次以分紅形式合作,容許玄人App使用她的肖像權及名字做宣傳。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載