› 選擇地區
三藩市
紐約
洛杉磯
其他美國地區
香港 台灣 北美
 
2019年06月12日

【創業起義】創業成功靠「非理性」 - 尹思哲

當一個人想創業,任性同熱情往往係最佳燃料。簡單嚟講,就係唔好諗咁多,做得幾多,盡做。 資料圖片

「五年前,我哋失敗咗。我哋失去親人,失去戰友,甚至連自我都失去埋。今日我哋有機會反敗為勝。你知你嘅任務。唔好犯錯,因冇得重來。大家小心,互相看守。這是為自己的存亡而戰。我們會贏。Whatever it takes,Good Luck。」以上呢段,係美國隊長係《Avengers: Endgame》入面嘅對白,呢兩日係社交媒體瘋傳,套返今日香港嘅情況,實在幾搞笑,但又真係笑唔出。

我想講下歷史。香港開埠前,差不多200年前,只係個小島,全島得嗰萬幾人住。香港嘅「起源」,其實係一趟非理性嘅過程。點解?因為當時,維多利亞女皇同英國外交大臣,根本唔想佔領中國任何地方,因為成本實在太高、又無着數,佢哋只係想清廷開放東部沿海四、五個口岸,方便進行合法貿易,即係搵食箒。

何解後來演變成佔領?因為當時有位仁兄——英方在華全權代表義律,認為單靠和平談判手段,唔足以迫令清政府開放口岸,必須要訴諸武力,佔領同割讓中國土地。義律佔領同割讓香港,只係一個意外,出於同清延交涉唔成功,而香港島又水深港闊,適合駐海軍, 於是佢說服女皇放棄舟山、佔領香港島。由嗰時開始,香港由一個漁村小島,發展成國際城市,至今行咗接近170幾年大運。

有位美國上咗市嘅Founder朋友S,曾經同我分享起佢嘅創業心法,亦正正係「非理性」。佢話:「考慮一件事當然需要理智,但當我一決定咗個件事,我就會自動變得不理智。」朋友S認為,自己始終係生意人,會睇數字去分析。但要件事成功,執行就係要快同狠。狠是什麼意思?就係唔好look back諗對錯,決定咗就勇往直前。

我嘅解讀係,當你想創業,理性就係方向盤,可以幫你搵方向。但理性本身欠缺動力,有佢嘅極限。相反任性同熱情,往往至係創業嘅最佳燃料。簡單嚟講,就係唔好諗咁多,做得幾多,盡做。


尹思哲
http://linkedin.com/in/wanszezit


wanszezit@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載