› 選擇地區
三藩市
紐約
洛杉磯
其他美國地區
香港 台灣 北美
 
2019年06月13日

【冰說聰明】閱文回購挾空軍 - 青冰

閱文2017年底上市,上市日爆升一倍,然後輾轉下跌,上月底創歷史新低,高位跌咗73%。資料圖片

年半前上市的閱文(772),挾着騰訊(700)親生仔之名,上市當日成功爆升一倍,高見110蚊,雖然市盈率逾百倍,但不少人仍然覺得有買貴冇買錯,可惜當天的110蚊,就是上市至今的最高位,這18個月以來只得一個方向,就是向下,上月底旗下網站因涉及不雅內容而被整改,創歷史新低29.40元,高位跌咗73%。

閱文周一宣佈,將動用不超過5億元回購股份,相比手持現金83億人仔,綽綽有餘啦,新經濟股跌到反艇之後出手回購,雷蛇(1337)便是其一,早前由低位彈一倍,市值大咁多的閱文,是否值得憧憬呢?

由高位跌七成後,估值由天價回歸現實,今年預測市盈率約21倍,貼地好多,但估值正常唔代表會炒,而今次高調宣佈回購,挾淡味甚濃。閱文股價在去年8月開始缺堤,從那時開始沽空盤就大增,沽空量經常佔當日成交量的25%以上,以今年1月為例,只有一天的沽空量少於當天的25%成交,講近啲,上周四的沽空更佔當日的55%成交,真誇張。

空軍看淡的原因青冰唔知,但閱文專登出份通告話要回購,就好有決心,因為公司在上月中的周年股東會,已循例授權作批股及回購,其實係可以直接在市場買完再申報,沒必要事先張揚出個通告嘅,所以管理層可能向空軍釋出訊號:喂!食飽要離場喇。

證監會網站刊出的累積沽空量,截至5月底,有3,365萬股未平倉,佔總股本3.2%,其實唔少,不過今年3月中時,這個數字見過4,500萬股,當時股價係約39蚊,換言之,這兩個月空軍已陸續食糊。由於回購有價格限制,閱文在周二未能到價回購,周三執筆之時已到價,唔知有冇出手呢,空軍收兵加回購,看來有機會在六月跑贏大市。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載