› 選擇地區
三藩市
紐約
洛杉磯
其他美國地區
香港 台灣 北美
 
2019年06月19日

【收市閒情】林鄭式道歉:Sorry囉 - 千頌C

林鄭第一次道歉,冇露面;第二次道歉,黑面,恐怕係再一次火上加油。資料圖片

林鄭噚日終於現身致歉,不過傳說中嘅鞠躬道歉就冇影,「撤回」兩個字更加係撬極都撬唔開,「撤銷6.12對示威者的控罪」當然亦冇提及。今次黑面道歉,恐怕係再一次火上加油。歷史告訴我們,道歉的確是一種藝術。

英國石油公司(BP)墨西哥灣漏油案:2010年5月,BP位於墨西哥灣嘅深海鑽油台爆炸,造成11人死亡,幾百萬桶油流入墨西哥灣,造成極之嚴重生態災難。時任CEO Tony Hayward喺事發後竟然講:「It's "relatively tiny" compared to the "very big ocean."」、「I'm sorry. We're sorry for the massive disruption it's caused their lives. There's no one who wants this over more than I do. I'd like my life back.」結局,佢終於得償所願,同年5月,宣佈辭職,正式Get his life back。

山一證券破產道歉記招化腐朽為神奇:1997年11月,日本山一證券宣佈破產,當時社長野澤正平出席「道歉記招」時,痛哭流涕,態度極為誠懇,佢講「公司虧損全都是我不好,絕非社員過錯,所以懇請支持山一證券的社員們,拜託了!」有膊頭、有擔當、不諉過他人,結果,因為呢次記招,日本一面倒同情山一證券,超過4,200家公司向已經破產嘅山一證券請人,令原本面臨失業嘅員工有新飯碗。

林鄭第一次道歉,冇露面,衰過WhatsApp講分手。第二次道歉,有露面、但黑面,誠意見唔到,見到嘅只係霸氣同唔忿氣,聽到嘅係:「Sorry囉!」至於黑警一哥、醫管局、警監會,接二連三嘅記招,表演嘅係「割蓆割得快,卸膊好世界」,冇人道歉過。

呢個時候,我諗起一個人,前警務處一哥,人稱Sorry Sir嘅鄧竟成。佢在任時,呢位「一哥」背負住警隊嘅壓力,三度代表警隊公開致歉,每次都係非常誠懇。退休後,佢曾接受訪問,講到道歉同唔道歉嘅矛盾時,佢講咗幾句說話:「你想以後的年輕人做錯事後承擔抑或唔承擔呢?致歉抑或不致歉呢?好多東西是需要考慮的。」

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載