› 選擇地區
三藩市
紐約
洛杉磯
其他美國地區
香港 台灣 北美
 
2019年06月25日

中環在線:信德股東會取消提問環節 - 李華華

有信德小股東希望舉手發問,但何氏千金同董事會成員都未有理會。

上市公司股東大會係小股東能夠同董事會直接對話嘅少有機會,但噚日舉行股東會嘅信德集團(242),喺宣讀股東會議程及投票後,主席何超瓊就宣佈會議結束,可憐年長嘅小股東舉到手都酸,何氏千金同董事會成員都未有理會,去如黃鶴。

信德股東大會有超過100名股東到場參與,場面墟冚,主席何超瓊及副董事總經理何超鳳均有出席,並由何超瓊主持會議。

一般而言,喺宣讀議程及收回投票表格後,股東會主持都會表明進入股東提問環節或問一句「股東有冇問題?」不過,何超瓊喺宣佈投票結束後,隨即同時表示會議結束,隨即離開,未有時間給予小股東提問。小股東反應不及,再舉手已無人理會,只能白白目送董事會成員離開,舉手舉足兩分鐘,始有信德職員發現,並主動向其查詢及寫低佢嘅問題,話會事後聯絡補答。

信德職員話,以往信德股東會大多數會設提問環節,今次會前亦有提醒何超瓊要問問股東有冇問題,但可能佢趕住出席另一會議,因此忘記咗,話下次會再提點董事會。
查實小股東山長水遠去股東會,部份真係關心公司發展,唔係想問「刁難」問題。好似今次咁,股東問嘅都係派息政策同公司未來地產項目發展,相信何氏千金都好樂意作答嘅。

李華華
mailto:LiWaWa@AppleDaily.com


LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載