› 選擇地區
三藩市
紐約
洛杉磯
其他美國地區
香港 台灣 北美
 
2019年06月25日

【金手指】股東抗議其實有用 - 孫柏文

俄鋁主席Zonneveld(右)上周四股東會後,主動搵孫柏文傾偈。 孫柏文提供圖片

上周,孫柏文喺本欄曾經預先宣佈會去上周四嘅俄鋁(486)股東會,同時話過我會着住件印有「冇息派、冇計傾、Where's Our Dividend?」嘅T恤去。我諗住分分鐘俾實Q阻止入場,但居然順利畀我開會。到股東發言時間,我第一個舉手,我一起身,在場人士見到我件T恤都笑一笑。

我哋呢啲香港人,當主辦單位聽意見嘅panel坐咗梁愛詩(俄鋁獨董)喺到,心裏都會有個佢哋將會當我發噏風嘅感覺。不過,我都照樣分享對業務、現金流、俄鎳股權等嘅睇法,特別係喺舊年,我哋呢啲香港股東都受盡欺凌,但都不離不棄,忠心如一。我最尾問:「所以今日我條問題係,我哋啲派息呢?」一問,在場嘅股東們,即時熱烈鼓掌!我好滾動啊。

佢哋嘅財務總監答,計過數,如果鋁價喺現水平企穩,就應該派。咁佢哋歷史都係每年中期業績派一次息,即係可解讀成鋁價到八月尾,董事局坐埋睇中期盤數時唔再跌,就會派。

當然,呢啲都係估估吓。我覺得佢哋會派嘅最大理由,就係主席Zonneveld一宣佈散會,就即刻走埋來搵我傾。當我問佢可否合照時,非常歡迎(上周五李華華登咗上報)。試問,一個二月先上任,到中期都冇派息諗頭嘅公司主席,會唔會敢一散會就搵着住嗰件T恤嘅股東傾偈合照呢?咪就係囉。市民抗議多數唔work,希望股東抗議得啦。

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載