› 選擇地區
三藩市
紐約
洛杉磯
其他美國地區
香港 台灣 北美
 
2019年06月27日

【冰說聰明】招行或成下個戰場 - 青冰

貿易談判若再拖落去,金融股或成下一個戰場。招行作為領頭羊,應該會被追住嚟打。資料圖片

招行(3968)周二開市無耐便急隊,到青冰留意到時已經是跌4%,無論在google及彭博新聞,也找不到似樣的原因,最後戰友通報係因為《華盛頓郵報》的一篇報道,話三間中資銀行在制裁北韓期間,幫北韓洗錢,招行是其一。文中講到好大鑊,直頭當佢係中興(763)及華為翻版,加上招行今年累升逾四成,不少投資者冇理單嘢堅唔堅,食咗糊先再研究。

由於臨近G20峯會及中美兩國元首的貿易談判,這個時候爆單新聞出來,難免令人懷疑係美國想施壓,先作威嚇並拿多一點籌碼,到時反枱傾唔掂,先加你三千億貨品的關稅,下一round就郁你的金融機構。內地國有銀行係大到不能倒,看似穩陣,不過估值就明顯比招行低一截,究其原因,係因為招行多年來管理優秀,尤以理財業務做得出色,十年以來盈利每年增長,其他大小國有或商業銀行,真係行埋一邊。

增長勁,估值高,亦係外資的寵兒,另一個重要身份,招行A股是富時A50指數的第三大比重,佔7.7%,僅次於平保及茅台,所以周二曾拖累富時A50指數急跌2.6%。本港股民對A50指數並不陌生,因為應該炒過南方A50 ETF(2822)。對於外資來說,富時A50指數期貨,是最活躍的A股股指期貨,成交閒閒地都有二、三十萬張,未平倉平約有六十幾萬張。講到呢度,不禁令人想起,唔通侵侵又想借單新聞搵食?

中興及華為,係國內頂尖的科技企業,所以順理成章變成出重拳的地方,如在金融創新能力的層面,招行及平保(2318)都係領頭羊,好喇,以往領頭羊都是褒獎的意思,高估值都要追住買,但現時卻要提防成為死亡之吻,侵侵追住嚟打,除非本周末兩國元首握手攬攬不計前嫌,否則再拖落去,能加的稅已經加晒,金融股或成下一個戰場。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載