› 選擇地區
三藩市
紐約
洛杉磯
其他美國地區
香港 台灣 北美
 
2019年07月09日

【操盤手札記】龍蛇混雜新股惑 - 割柑人

潘樂陶間安樂工程申請上市,被連登仔質疑上市前派息高於集資額兩倍,冇集資需要。 資料圖片

6月以嚟,香港爆發連串大規模「返送中」示威,林鄭政府依然懶理訴求。回歸22年,香港經歷4任特首:一懵、二貪、三狼、四毒,好多人問香港何辜?香港人到底做錯乜嘢?三個字——交錯稅!

示威持續,會影響投資情緒。7月股市要過兩關:頭關中美貿易談判,次關聯儲局議息。頭關大步檻過,中美重新埋枱;次關有啲濕滯,美國「非農」好過預期,7月減息派彩,或由0.5厘縮至0.25厘。

利率預期有變,美國10年期債息重上2厘,美滙指數重上97,反映套息交易冚倉,資金回流美元。美股高位回調,中港股市承接跌勢,周一分別撻低2.6%同1.5%。恒指出現島型頂,短線重要支持位為6月26日低位27985。

中美官員本周將會透過電話展開貿談,不過,毋須過份憧憬。美銀就提醒,若然「鮑威爾put」(即聯儲局逢大跌市即托市)加「特朗普call」過於強大,中美貿易協議將會更難達成,皆因美國可以喺越嚟越低嘅利率下,締造一個不斷升級嘅貿易戰。
近日新股熱潮再現,買新股小心有「股惑」!律政司鄭若驊老公潘樂陶間安樂工程(1977),就被連登仔質疑上市前派息高於集資額兩倍,冇集資需要;另外,撐警譚詠麟有份嘅藝能環球,亦正申請上市,招股書指最大風險就係譚詠麟!

新股之中,啤酒龍頭百威亞太(1876)最為市場受落。比對同業毛利率,該股為55.2%,跑贏青啤(168)嘅37.7%同潤啤(291)嘅35.1%;至於純利率,該股為16.7%,亦跑贏青啤嘅5.3%同潤啤嘅3.1%。估值方面,該股預測PE為33.5倍,同青啤、潤啤嘅30.7倍、37.1倍相若。抽新股短炒,可以諗諗。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載