› 選擇地區
三藩市
紐約
洛杉磯
其他美國地區
香港 台灣 北美
 
2019年07月10日

【收市閒情】分析師之小圈子政治 - 千頌C

香港分析師協會主席鄧聲興。 資料圖片

唔少人仍然「我不講政治」,結果「政治」是會搵上門,香港分析師協會正係一個活生生例子,更可以話係香港嘅縮影。

第一:話說會方7月2日,突發聲明譴責「暴徒」,但發聲明前,唔好話討論,根本完全未有知會會員。咁會員們就自然嬲啦,你問都唔問聲,就屈我「譴責」?如此形同強姦民意,將逾150名會員「譴責聲明」集體綑綁送中。同林鄭冇分別!

第二:聲明一出,Group內就如香港出現兩派,有人先拍掌叫好,一聲聲「主席英明」;但隨後民意大反彈,由林小珍開始,會員紛表示「聲明不代表我」,一日有逾廿人退會明志。結果主席鄧聲興就一句,「我哋一如以往都是理事會通過決議」。言下之意,「我哋不嬲都係小圈子㗎啦」。事件鬧大,全行都知,此時,會內開始有人問「邊個係鬼?」「邊個爆料?」。遇上黑箱作業,制度有問題,你不怪當權者,反而去怪受害人?This is so Hong Kong lor。

第三:最離譜嘅事情,發生喺前日。本來上星期理事們為安撫會員,承諾會於前日會議上,討論發澄清聲明,表明聲明僅代表理事會立場,當日會長強調「我哋例會將會討論呢項議程,請放心」結果係點?哼!有理事於會提出動議,由於冇人和議,所以討論完結!真正「壽終正寢」。

最後,有更多人退會,最新已有兩成,近30人,當中包括黃國英。

小圈子政治嘅可怕,係將你嘅民意騎劫,綑綁,最後成為他人的獻禮,為他人作嫁衣裳。

今次《逃犯條例》風波,追本溯源,是行政長官由小圈子選舉選出,沒有足夠民意授權,佢老闆係中央,自然不理民意,100萬人、200萬人,如果毅進制計法係咁【YJ= Exp(0.8858 Ln (x))[x = 十進制]】,咁林鄭制就簡單得多,直接【x=0】。


千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載