› 選擇地區
三藩市
紐約
洛杉磯
其他美國地區
香港 台灣 北美
 
2019年07月12日

【中環在線】郭基泓表面斯文 速度驚人 - 李華華

郭基泓昨日出席新地第8屆公益垂直跑啟動禮。何耀勤攝

新地(016)郭氏家族第三代三個代表人物各自都有鮮明形象:運動健將郭基煇(Adam)、文質彬彬郭基泓(Christopher)同低調神秘郭基俊(Geoffrey)。不過,咪畀外型呃到,先為入主以為斯斯文文嘅Christopher就實係四體不勤,其實佢必要時都可以有速度、走得快。

噚日新地第8屆公益垂直跑就搞咗個啟動禮,Christopher同樓神雷霆就代表公司出席。近排香港立立亂,大家都想知啲大地產商點睇香港嘅營商環境。殊不知傳媒同樓神扑緊咪,轉個頭就見到Christopher三步併作兩步,幾下就由會場前方閃到通道離開,走位相當精湛。

樓神就解畫話佢可能有會趕住開要走先,相信幾位今年都會照舊參加垂直跑,至於堂阿哥、非執董Geoffrey就唔知會唔會現身喇。其實都明嘅,香港時局日日變,容乜易跟車太貼,都係默默強身健體實際啲。

以Christopher噚日表現出嚟嘅速度,華華相信佢今年垂直跑都會有好表現。如果想感受吓第三代嘅走位,即日起就可以報名垂直跑㗎喇。

李華華
mailto:LiWaWa@AppleDaily.com


LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載