› 選擇地區
三藩市
紐約
洛杉磯
其他美國地區
香港 台灣 北美
 
2019年07月17日

【創業起義】當警權大過產權 - 尹思哲

當警察進軍大型購物商場,等於直接衝擊上一代人最核心最珍重樣:私有產權,結果直接令上一代覺醒晒。 資料圖片

對上成個月,直到近幾日,相信大家都有種感覺,點解個個禮拜都有新嘢,睇到個心好煩好累。

點解後生仔咁勇?理由好簡單,因為絕望、睇唔到將來。既然冇未來,不如把握現在,反枱,同你班掌權嘅大人死過。

相反,呢幾日我覺得最amazing,係見到有上一代人都開始覺醒,有老人家、師奶、阿叔亦有街坊,會企出嚟保護啲後生仔女,喝退想入侵佢哋家園又無搜查令嘅警察。

咁點解連佢哋都覺醒?我認為原理,同部份公司創辦人,搵錯投資者入局,畀咗股份同board seat出去之後,由初期感覺良好,去到意識自己失去公司控制權,概念上好相似。創辦人白手興家,搞咗間成功嘅公司,有好多重大嘅決定,例如銀行戶口啲錢點洗,可唔可以直接派息分享獲利、還富於自己,利潤可唔可以唔好射曬落海、搞大白象擴張工程?答案係唔可以,因為引入咗投資者,而佢係有權唔畀。

當警察進軍大型購物商場、入侵私人屋苑,嚇親啲細路,騷擾到街坊,其實係要明白,咁樣等於直接衝擊上一代人最核心最珍重嗰樣嘢。上一代會諗,我窮一生人嘅努力,發奮上流,至可以買到層樓,喺度安身立命,你嚟搞我啲街坊,打我哋後生仔,仲嚇親啲小朋友,唔係啩?

獅子山下嗰一代,要嘅嘢好簡單:不過係想過舒適嘅生活,有自己家園之餘,私有產權同人身安全有保障,一家人唔使擔驚受怕。警察今次嘅行為,直接衝擊到香港的資本主義同生活方式嘅根基,真係唔講得笑,結果直接令街坊、上一代覺醒晒。偏偏呢個時候,局長仲出嚟火上加油,話唔會放棄明日大嶼。獅子山下嗰一代,唔理藍黃,總之上咗岸嘅、有資產喺身嘅,當堂覺醒晒,然後忍唔住問:我哋都曾經好努力,建設社會,貢獻社會,點解個社會,咁樣對番我?


尹思哲
linkedin.com/in/wanszezit


wanszezit@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載