› 選擇地區
三藩市
紐約
洛杉磯
其他美國地區
香港 台灣 北美
 
2019年07月18日

【冰說聰明】新濠跑贏有原因 - 青冰

何猷龍打骰的新濠,今年累升32%,力壓老豆澳博的29%。資料圖片

講賭股,戰友即時會諗到銀河(027)及金沙(1928),是為行業龍頭,再跟住數落去的會是澳博(880),但你未必會想得到,今年表現最好的賭股,並非以上三者,而是賭王個仔何猷龍的新濠(200),今年累升32%,力壓老豆澳博的29%。

青冰以往都分析過賭股,亦以遊客角度睇,新濠是眾多賭場最多元化,非博彩元素最高的公司,完全切合中央及澳門政府定下的續牌條件,不過,相信都唔係今年跑贏的原因嘅,如果要斷估一個理由,青冰認為係新濠已晉身環球賭股之列。

新濠在5月公佈,斥資近百億港元,入股澳洲Crown Resorts 19.9%股份,當年Crown係同新濠拍住上的,曾持有新濠旗下新濠博亞逾三成股權,但Crown在2016年起開始減持,至2017年新濠完成回購貨尾,伙伴關係終結,點知今年又再合作了,從屬關係仲對調㖭。何猷龍當時接受訪問,指旗下管理的賭場將增加了澳洲及英國,足證集團全球化的成果,亦可向日本政府展示佢哋具有全球經驗,有利爭取賭牌。

大阪早前向有意競投的企業徵集初步規劃,有七間企業報名,政府就公佈咗其中5間,包括新加坡雲頂、拉斯維加斯金沙、新濠、美高梅國際及永利渡假村,銀河冇在公佈的名單內,但管理層係講過會參加的,又提返你,雖然啲名係熟口熟面,但其實金沙、永利及美高梅,出戰的都是母公司,而不是在港上市嗰幾隻,唯一的何家及香港區代表,只有新濠,所以青冰上文話,新濠已擠身環球賭股之列,係有根據㗎。

雖然貿易戰緩和,大家都預期中美唔會拎續賭牌嚟玩嘢,但始終中國風險仍是要打一點折扣,而新濠就是六間在港上市的賭股中,唯一面向世界的,鬼佬資金如要分散風險,相信新濠會是首選。


青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載