› 選擇地區
三藩市
紐約
洛杉磯
其他美國地區
香港 台灣 北美
 
2019年07月23日

【金手指】白銀戰隊復出了? - 孫柏文

黃金以慢牛姿態咁升穿咗五年高位,一向落後嘅白銀,亦開始郁。 資料圖片

古有卸甲歸田,今有卸銀歸股。2006年,孫柏文自封「白銀戰隊隊長」,喺白銀賣緊10美元一盎斯時,叫大家一注獨贏咁買,仲話十年內睇升12倍。到2011年,白銀升到49.95美元,只升五倍後見頂。到今日都仲有人會耐不耐笑我唔準。我確實抵俾人笑。

如果當年保守啲,話會升五倍,今日我仲唔係財演影帝?之後,貴金屬進入寒冬,不論全球央行們點印鈔,黃金、白銀都係冇起色。直至呢排,黃金以慢牛姿態咁升穿咗五年高位,一向落後嘅白銀,亦開始郁。多年冇搵我或多年冇同我傾貴金屬嘅fan屎,都開始再傾番呢個議題。

當年我預見到美帝將會遇到,由樓市爆煲引至銀行資不抵債嘅大型金融危機後,貨幣供應將大幅提高推動銀價。今日我見到比當年更甚嘅借貸,所以之後更要印。用2006年嘅邏輯,金銀更要買。

不過,當年我寫過話如果人類發明煉金術,就唔買得金銀。2019年嘅今日,人類當然未發明煉金術,不過,例如bitcoin嘅無政府控制電子貨幣不斷湧現,令搵「避印」資金多咗好多出路。所以,我真係冇當年勇話白銀會升12倍。點都好,如果你真係對金銀有興趣,我下周就會推介我最喜愛嘅金礦股。希望可助大家參考,白銀戰隊是時候復出了。

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載