› 選擇地區
三藩市
紐約
洛杉磯
其他美國地區
香港 台灣 北美
 
2019年07月23日

【操盤手札記】林鄭血債點收科 - 割柑人

血洗沙田、血洗元朗,一幕幕暴露林鄭政府道德崩壞。 資料圖片

血洗沙田、血洗元朗,一幕幕暴露林鄭政府道德崩壞,仲講乜嘢溝通!股東大會係上市公司同小股東溝通最直接嘅橋樑,上市公司唔會只邀請一小撮小股東開股東大會,而係所有小股東都可以參與。反觀林鄭,只曾邀請大學生閉門密會,被拒收場。

不過,就算開股東大會,上市公司唔想小股東咁多聲氣,亦有好多符弗,最常見係喺山旮旯開會,更甚係出動社團人士干擾,早年有兩隻停牌創業板公司,就係例子。據講上頭已經發下維穩費,大班惡煞開工。再爆浴血戰,林鄭點收科?

講番個市,焦點仍然係貿談同減息。先講中美貿談,華為問題撠住,埋枱未有着落。至於美國減息,市場憧憬聯儲局本月減息半厘托市,但被紐約儲行潑冷水,美股上周五低收。港股周一跌1.4%,收28371,短線或先下試7月15日低位28071支持。

當全世界等緊聯儲局月尾出手,啟動10年以嚟首次減息之際,上周韓國、印尼、南非、烏克蘭央行已經出手;5月以嚟,馬來西亞、新西蘭、菲律賓、印度、澳洲央行更已搶先減息。上述央行幾乎全屬亞太區央行,可見亞太區經貿景氣低迷。

環球減息,利高息股。港股快將中期放榜,50隻藍籌中,舊年36隻派發中期股息,26隻增加派息。撇除特別息,以銀碼計,港交所(388)最大;以增幅計,中石油(857)最高。至於今年,按彭博數據,預計有23隻藍籌增加派息,包括公用股煤氣(003)、電能(006)。

非藍籌公用股,商業信託香港電訊(6823)亦係收息之選。集團業務穩健,過去5年派息年年增加,現價12.58元,預測息率5.7厘。5G時代殺到,香港10月拍賣5G頻譜,需要龐大光纖網絡,此股食正條水。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載