› 選擇地區
三藩市
紐約
洛杉磯
其他美國地區
香港 台灣 北美
 
2019年08月07日

【收市閒情】安樂上到市耐人尋味 - 千頌C

安樂工程上市第一日炒高四成、跟手散戶接貨,接就發盈警,15個交易日隻股就玩完。 資料圖片

當林鄭8月5日,率眾司長黑起塊面、「義正辭嚴」強烈譴責示威者掉國旗時,作為香港特別行政區律政司司長的鄭若驊,卻依舊未見「芳蹤」,與市民一同罷工。其實,只要望兩眼安樂工程(1977)的股價,你就知道,後來才申報有份做大股東的鄭若驊,生活一定過得安樂自在。

話說安樂工程上市前,唔單止被爆上市前兩年,向股東派息逾12億元,更玩盡財技,上市前將原本屬於公司物業,抽到鄭若驊兩公婆手上,然後兩公婆再租返畀上市公司,只係少於3年時間,就可以等散戶幫手交約4,000萬元租金畀返佢兩個。

安樂工程現金多過上市集資額兩倍,點解港交所會畀佢上到市?港交所2018年,唔係就已引入是否「有足夠上市理由」、「真正融資需要」作為審批上市的重要準則咩?今年3月,港交所就上市決策作出公佈,羅列A至X個案例,解釋咩情況下會拒絕上市申請,其中五間正正就係因為有「大量現金」,所以被評為「缺乏商業理據,因此非真有集資需要。」仲有另外一間死因:「一直保持正數的營運現金流」。連正現金流都過唔到審批,但安樂工程上市前派12億元息,反而安安樂樂上到市,然後第一日炒高四成、跟手散戶接貨,接着就發盈警,15個交易日隻股就玩完。如果林鄭係港獨之母,咁鄭若驊夫婦係就be water界嘅代言人。

安樂工程上到市,之前被Reject嘅公司當然唔忿氣,市傳有幾間公司,已決定要拎住安樂工程呢個Case,搵保薦人去同港交所上訴,質問「點解安樂工程上到我就上唔到!」今日我問「如果林鄭沒有硬推送中條例」,安樂工程都未必咁受注目,所有政府相關機構嘅公信力就唔會被毀於一旦,呢班上市公司,亦都唔會咁勇拎「律政司司長」去做上訴證據。今時今日,所有事情,都是林鄭自己攞嚟。


千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載