› 選擇地區
三藩市
紐約
洛杉磯
其他美國地區
香港 台灣 北美
 
2019年08月13日

【金手指】走,都問心無愧 - 孫柏文

今次發生事件,應該係一次畀香港人清楚睇到自己前路點行。 資料圖片

2015年11月23日凌晨,孫柏文記得攰到瞓咗喺區選點票站對出嘅一張長椅。我當時參選,開票知輸咗。一名義工走埋來問我感受,我答:「盡咗力,講晒心底嘅說話。走,都問心無愧。香港為我做過嘅,今次後再冇拖冇欠。」

我又記得今轉六月第一次百萬人示威,外國傳媒訪問個企喺維園嘅後生仔。問佢示威希望會有咩成效。佢諗都唔使諗,就話:「唔會有。」咁記者再追問點解要走出來,佢答:「我要知自己已盡咗力。」

同大家一樣,我都唔知會點收科。更唔想諗後遺症會係乜。不過,今轉應該係一次畀大家香港人清楚睇到自己前路點行。

2017年,BBC電台搞咗個回歸廿年節目,請咗啲同香港有關嘅人上去傾吓。當時我坐喺「聯滙之父」Greenwood 旁,話:「香港將會踏上黎巴嫩之路。」當時一講,俾主持人寸話「有冇咁誇張呀?」我補充話黎巴嫩曾經被譽為「中東巴黎」,中東最開放嘅金融中心。不過我話黎巴嫩人各散東西,都能保自己嘅本質。例如墨西哥首富,都係黎巴嫩裔人。

最後,當年科大成立廿五周年時,請咗我最欣賞嘅歷史學家Niall Ferguson做講者。我有去,當時問:「根據你本War of the World,只要出現帝國邊疆移動、唔同人種存在兼互相覺得對方比人不如、同埋經濟動盪,就會有大屠殺。香港出現緊呢啲症狀,咁香港會否出現呢?」

佢話唔會,因為香港人同大陸人係同一種人喎。

呢轉都應該係最唔黑天鵝嘅黑天鵝了。

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載