› 選擇地區
三藩市
紐約
洛杉磯
其他美國地區
香港 台灣 北美
 
2019年09月10日

【大棋局】2020庚子躁動(六) - Mr. Tregunter

中國正面對一個歷史上的重大抉擇關口:開放,要開放幾多?開放唔會令中共倒台,但會帶來衝擊,尤其是頂層。
資料圖片

蘇聯如何倒台?係中國共產黨一直重點研究嘅課題。

俄羅斯前副總理沙赫賴點出一個真相,同大眾認知有相當落差。事過境遷,馬後炮去睇容易出現一種論調,蘇聯係因為人民追求民主自由而倒台。由於80年代蘇聯經濟發展出問題,社會主義計劃經濟玩唔到落去,於是湧現經濟改革呼聲,轉型為資本主義,而資本主義就要連帶民主自由一齊做。

但沙赫賴認為並不如此。在蘇聯倒台前所做的多次民意調查顯示,平民要求轉型到資本主義,不到兩成。有此訴求,係政府同共產黨內高層,近八成贊成改行資本主義。當時主要有三種路線之爭:其一,繼續改革,逐步實行民主;其二,放棄改革,直頭番去最初社會主義形態;其三,完全放棄社會主義,改行資本主義。

掌握權力嘅政府同共產黨高層係咁諗,逐步實行民主,意味自己特權會被削;行回頭路番去社會主義,特權可以保留甚至擴大,但對身家財產冇保障,而國家經濟越來越差;改行資本主義,係最有機會食大茶飯。社會上最頂層的人物諗過度過,改行資本主義思潮湧現。簡單舉一例,切爾諾梅爾金,前蘇聯天然氣工業部部長,後成為國家天然氣工業康采恩理事會主席,掌握俄羅斯40%天然氣儲備。當蘇聯解體後,佢由檯底下的天然氣大王,正式躍身為檯面上的天然氣富豪。

中國吸取蘇聯倒台教訓

社會主義嘅重點,係國家資源的分配權力歸於政府。於是在官場中,指派誰去管理國有資源,就意味指派誰去當諸侯封邑食祿。一旦社會主義改變,政府不再掌有國家資源分配權力時,諸侯割據容易應運而生。中共長期以來唔敢政治改革,重中之重,在此。

但時代不斷進步,天下間並無一種體制可以不改進玩落去。中國正面對一個歷史上的重大抉擇關口:開放,要開放幾多?開放就意味政府對經濟之掌握度下降;對經濟之掌握度下降,就意味對人民之掌握亦下降。開放唔會令中共倒台,但會帶來衝擊,引發人心躁動,尤其是頂層。

面對蘇聯倒台的教訓,現時中國顯然有一種取向,就係寧緊勿鬆。就喺呢個時候,以777票當選的林鄭,行事確實只有6與8之間的味道,在中共建政70周年之際,選擇以壽終正寢賀壽。歷史之轉捩點,就係需要關鍵人物。分享第六曲,《Hymn to Red October》。
待續

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載