› 選擇地區
三藩市
紐約
洛杉磯
其他美國地區
香港 台灣 北美
 
2019年09月10日

【金手指】期待鋁業霸權誕生 - 孫柏文

全球鋁業都捱打,因產能過剩。
資料圖片

噚日朝早《金融時報》報道,話有大陸公司正同持有俄鋁(486)母公司En+兩成幾股權嘅俄羅斯國有銀行VTB傾買佢哋嘅En+股份。

VTB擁咁多股權,係因之前En+脫離美帝制裁威脅嘅其中一項條件,就係要將前大股東嘅股權攤薄。所以國營嘅VTB就捱義氣,將債轉股,放棄穩定嘅利息收入,換來(到今日都冇)嘅派息機會。

當然,洽購十劃都未有一撇,不過如果最好嘅情況諗,會點呢?相信大家同孫柏文一樣,都可能睇過舊年五月「青衣隱世股神」嘅訪問。

被問到佢睇緊邊隻,佢就直答話:「依家咪博俄鋁,上市價差唔多成11蚊,間間鋁業都無錢賺,你夠膽買,分分鐘升到十幾蚊。」首先,訪問出街時俄鋁賣兩蚊股。你跟佢,一年已賺五成。不過,最緊要嘅係全球鋁業都捱打,因產能過剩,有一半嘅公司都係越煉鋁越蝕錢。

全球產量最大三間鋁廠,都係喺香港上市,俄鋁係其中一間。如果傾緊入股En+嘅公司,係其餘兩間大陸公司,咁佢哋手上嘅鋁產能,就有支配性地位。全球鋁業霸權誕生!減產提價救行業(或更準確咁話,救啲借咗錢畀大陸鋁廠嘅銀行債主們)就可以實現。呢個當然係個遙遠理想,不過如果發生,青衣隱世股神嘅俄鋁「十幾蚊」目標價,就肯定不是夢了。

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載