› 選擇地區
三藩市
紐約
洛杉磯
其他美國地區
香港 台灣 北美
 
2019年09月10日

【操盤手札記】北大人轉風向? - 割柑人

豬價持續上行,不妨候回吐分段收集中糧肉食。 資料圖片

上周三傍晚,林鄭喺「The bill is dead」之後,終於收返條屍,撤回修例草案。不過,呢個遲嚟兼只係min pay嘅回應,市民唔收貨,示威未降溫;市場亦唔收貨,恒指夜期由升轉跌。兩日後,惠譽更破格喺未下調展望前,直接下調香港信貸評級。

周一,美國國會復會,將會審議《香港人權及民主法案》。大戲開鑼前,觀望氣氛濃,港股喺中美10月重啟貿談、聯儲局放鴿、人行放水下,仍跌9點,收26681。恒指上周已突破頭肩底頸線26356,量度升幅可見27800,但短線或會出現技術性後抽,回至頸線支持。

中國對反修例示威嘅睇法,喺三大官媒系統──《人民日報》、新華社、央視之中,早前主要由《人民日報》系統開聲,近排則見新華社出聲,轉風向乎?上周三,撤回修例當日,新華社就發文《沉重的底色與扭曲的方向——香港修例風波背後的一些社會深層根源》。

該文應該係中央輿論首次完全冇用「外國勢力」、「反中亂港」呢類角度去解讀反修例風波,反而直接探討香港嘅深層次社會結構矛盾,唔再一味耍官腔叫「一國兩制」、「支持特首依法施政」呢類口號,用語輕咗。

經過周日連場示威,周一《人民日報》亦顯得低調,「開欄的話」題為《三問豬價:價格為何漲?供應穩不穩?產能咋恢復?》,唔通生豬供應更重要?話時話,雖然大陸話非洲豬瘟疫情可控,但生豬供應仍緊張,價格按年已貴近倍。

滬深港股通換馬生效,新納入北水可投資名單嘅股份共22隻,當中表現最標青嘅係中糧肉食(1610),飆8.8%。該股正係從事生豬養殖、豬肉及肉製品產銷、飼料生產,以及進口冷凍肉類。豬價持續上行,不妨候回吐分段收集。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載