› 選擇地區
三藩市
紐約
洛杉磯
其他美國地區
香港 台灣 北美
 
2019年09月11日

【收市閒情】當實Q比警察更可信 - 千頌C

上星期四有防暴想強闖坑口安寧花園,一個年過70嘅保安,一夫當關,趕走防暴。

「我在視察後感到非常痛心,無論是香港國際機場或是香港的鐵路系統,都是香港的命脈。」經過三個月嘅運動,死嘅死,傷嘅傷,林鄭都冇為過一滴血覺得痛心,反而一部閘機而黯然神傷。

閘機是死,人是生。我會更珍惜某一批有血有肉有人性嘅保安。話說屋企樓下保安,個人冇咩點,係煩膠啲。即係你樓下撞到佢時:

夜咗返佢會話「今日咁夜啊!」,你可以點應,都係「係啊……夜咗。」

早咗出門口佢又話「返工啊?」,心諗,唔通收工咩,但虛偽嘅我當然會禮貌講,「係啊,返工啊。(微笑)」

不過最近一次經歷,令我對呢位保安叔叔有啲歉意。話說,有日遊行返歸,着住黑色衫,返到去又見到佢,心諗,呢度深藍屋苑,希望你唔好大大聲講,「你去完遊行啊?」點知,係我小人之心度君子之腹,當日佢一反常態,一言不發,衝去幫我哋撳定電梯門,等我入電梯先講一句「辛苦啦,早啲返屋企。」係一件好小嘅事,但係窩心嘅。

過去三個月,有唔少保安盡忠職守,上星期四有防暴想強闖坑口安寧花園,一個年過70嘅保安,一夫當關,趕走防暴。你幻想吓,佢除咗件制服,其實只係一個阿伯,而佢就擋一班荷槍實彈嘅防暴,保護居民,係型到值得未到新年都畀利是佢!

7月底,中環IFC職員,又係對住一批防暴,霸氣一句「話番畀你哋指揮官聽,我哋唔歡迎你入嚟商場。」轉身就走,而克警就面懵離開,成功令呢個商場避過一劫。數到7月中,當日防暴想衝入沙田中心,有保安引路帶市民離開,亦有保安員即使身負腳傷,都堅持企喺商場外擋住防暴。

所以,如果你有幸遇到好實Q,就不妨多多表揚;遇到唔好?做吳三桂嘅……?仲講新年唔派利是?炒咗佢啦!(如果你有權炒佢)。畢竟,今時今日,保安某程度上可信過所謂警察,因為保安有冇盡責,係賞罰有度;但克警呢?做任何事,都冇後果。


千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載