› 選擇地區
三藩市
紐約
洛杉磯
其他美國地區
香港 台灣 北美
 
2019年10月02日

【收市閒情】香港的「國進民退」 - 千頌C

被標籤成愛國企業嘅新地,突委任華潤置地前主席兼潤地黨委書記吳向東做獨董。資料圖片

「連小小香港都管不好,那不是丟了習主席的臉?」香港嘅混亂,對於中國,唔單止係面子問題,更加係錢嘅問題!嗱,先唔好講借起天價基建、人工島去搵香港着數呢類旁門左道,商務部原副部長魏建國自己都講「香港一直是內地最大外資來源地」!睇錢份上,中國未來更會好好「管治」香港,都相信係黨之常情。要管?咁點管?

中共建國70年,近年經濟龍虎飛躍,於是近年反手使出一招:國進民退。上年習總都仲會出聲,就呢個論調安撫民企,不停強調「冇啲咁嘅樹。」越否認,多數就越係心裏有鬼。

阿里巴巴馬雲、騰訊(700)馬化騰、聯想(992)柳傳志先後被退休。杭州有百名官員,亦準備派駐百間重點企業,包括阿里、吉利、娃哈哈等;呢啲唔係國進民退嘅,唔通係「同志們,辛苦啦!中央關心你健康,好好休息」咩?

中國早就認為「一國」先於「兩制」,林鄭亦已當眾否定基本法嘅「港人治港」,香港同樣要國進民退,相信係遲早嘅事。月初國資委要求國企,加強投資香港,唔可以只係揸股份,仲要拎到公司控制、決策權,亦即係要全面赤化港企,令香港亦跟隨中國「國進民退」嘅大潮流。地產係香港嘅命脈,中國又點會唔target四大家族呢?

咁啱得咁橋,喺近月社會運動,已被標籤成愛國企業嘅新地(016),突委任華潤置地(1109)前主席兼潤地黨委書記吳向東做獨董!於敏感時間引黨員入董事局,中央眼裏係愛國嘅舉動,但個人來講,相信新地一定係用人唯才啦,唔通係想借黨員買政治保險咩……之前有傳中聯辦入300飛認購新地匯璽III,係唔係真我就唔知。但新地內部有條team叫China Affairs,一條咁出色嘅小隊,一定要有個出色嘅主管,呢team個主管K就勁啦,之前做中聯辦嘅。

雖然噚日國慶,全港30商場關閉,新地商場佔9間,但其愛國情操,真係不容置疑der!

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載