蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月22日
馬上成為壹會員

【BigTeaRice】港燈隱世大股東

建立時間 (HKT): 0122 06:00

雖然老股東怨聲載道,但電能(006)分拆港燈(2638)既成事實,噚日截飛之時,班公公婆婆都得趕去中央登記處簽番個名。據同事講,喺現場截獲嘅,都係啲揸住電能以十年計、講明唔識用電腦嘅退休長者,而且仲非常富貴!

好似其中一個馮伯伯,揸住電能超過30年,報稱獲分4,000手港燈,即係話佢揸住約1.6萬手電能,以現價計,值4.8億港紙,佢話「反正啲錢都係擺喺度,咪買嚟收息囉」,勁豪氣!

其實電能呢隻神級收息股,充斥住好多隱世富豪股東,如果唔係李嘉誠當年買咗,應該仲有N咁多伯伯巴閉過馮伯伯,其中兩個,一定會係當年咤咜一時嘅山打皮鞋兄弟老闆。

據中環金融圈嘅Uncle輩講,當年李生收購港燈嘅時候,一如所有併購,先要收晒啲街貨,其中要李生親自上門傾嘅,包括山打皮鞋嗰兩兄弟,原來呢兩兄弟賺賺埋埋,一有錢就買港燈,買吓買吓,竟然已經買到揸住港燈6%,所以唔到李生唔上門,而若果當年嗰兩兄弟唔肯賣,應該會改寫港燈嘅歷史。

話時話,好多同事「報稱」唔知山打皮鞋係乜東東(絕大部份人應該係想掩飾其年齡層),查實山打皮鞋係上世紀六十年代已經開業,最初喺萬宜大廈地下,係非常巴閉嘅高級鞋店,去山打買對來路貨Clarks,係好多人一生中嘅大事,而佢哋嗰陣嘅廣告slogan係︰「山打鞋!山打鞋!山打最靚係皮鞋!皮鞋最靚係山打!山打最靚係皮鞋!」係咪好正呢?

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載