蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月30日

【東瀛の西多】港男日本開茶餐廳 「我杯奶茶贏晒成東京」

306,594
最後更新: 0530 18:55 / 建立時間 (HKT): 0530 00:01

香港人去到日本,唔食返十餐八餐壽司刺身,又點對得住自己張機票?你又點會估到,小記東京之行,走咗去食正宗港式茶餐廳。「我哋呢度整杯奶茶,我啲碗皮蛋瘦肉粥,可以話俾你聽,我贏晒成個東京。」老闆楊官華(Alex),將一杯正宗港式奶茶帶到東京,講到尾,其實又係香港土地問題。

相關新聞:【東瀛の西多】日本的奶茶特別貴 一杯盛惠27蚊

Alex今年3月,就喺新宿開咗間港式嘅「華記茶餐廳」,要做到高水準嘅港式茶仔,食材絕唔可以馬虎。一杯絲襪奶茶,黑白淡奶同茶膽嘅完美配合,更加係靈魂所在,問題係,啲「靈魂」喺邊搵?「我哋只能夠螞蟻搬家咁,我哋做不動產,每個禮拜都有同事帶啲客過嚟睇樓,會幫我地帶啲黑白奶過嚟。」

有食材都唔夠,仲要調校奶茶隻味,「我地試左幾多次啊,飲到我都胃痛,如果我依家俾你隊七八杯,你都頂唔順啦,但係為咗要試到個品質係啱。」點止奶茶,連雲吞麵個湯底,都堅持要喺香港買大地魚返日本熬過,細緻到公雞杯碟,都係由香港托過去。

Alex對喺日本食到港人港味,係有一種堅持,個堅持源頭,係來自「樓市辣招」。佢喺香港經營地產代理廿幾年,早喺七年前,旗下就有廿幾間地產代理舖。不過去到2010年起,港府就不斷推出辣招,辣到成交量大縮。機緣巧合下,2013年佢就去咗日本發展代理業務,一做就做到依家。

被問到點解做做吓地產代理,無啦啦搞副業,開舖做茶仔時,Alex就一輪咀講喺日本食飯嘅問題,「其實日本嘢呢,你間唔中食吓係非常之好食,但如果你日日食魚生,或者日日食拉麵,始終係唔係好慣。」

佢又提到一個文化差異問題,有一次佢同公司同事慶祝生日,去餐廳食飯,諗住拎個蛋糕出嚟切,但俾侍應制止,「佢覺得你騷擾到人哋,咁佢就無錯嘅,但好掃興架嘛。」

思鄉病發,加上等同事有個食晏、聚腳嘅地方,令佢決心要開一間堅持港人港味嘅茶餐廳。日本人唔鍾意飲奶茶啦?唔理!入鄉隨俗用自助售賣機落單慳成本?唔制!總之佢就係要開一間令人入到去,就好似返咗香港嘅感覺。

憑一份對味道嘅執著,「華記茶餐廳」已經由原本當係員工飯堂嘅初衷,慢慢變成當地香港人嘅眾腳地「好多人坐兩個鐘頭車,專登來到食一碗雲吞麵或者一碗皮蛋瘦肉粥、一碟腸粉,同埋呢度個個都識講廣東話,好有親切感。」問到呢度聽唔聽到粗口?「始終都係香港人,香港人都係豪邁奔放。」

目前餐廳晏晝就以日本食客居多,夜晚就香港人多。雖然Alex話茶餐廳呢份副業,唔係賺到咩錢,「最少唔使蝕錢」,但下個月將會喺東京開多兩間分店,之後仲會加入更多香港嘢食,好似菠蘿包、蛋撻咁。

記者、攝影:倪敏慧
剪接:陳家文

掌握財經生活資訊,即Like「蘋果ATM」fb專頁啦!
http://fb.com/appledailyatm

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載