蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月14日

【笑到最後】追騰訊表現的奇怪思潮(高明)

14,425
建立時間 (HKT): 0114 17:30

騰訊(700)調整兩日後重新破頂,一隻股本身有增長憧憬,再加分拆概念,最重要係,市場不斷buy呢個意念,有咩嘢好得過一路升,一路等分拆?

當然,買唔買都係各自嘅投資選擇,未必所有人對增長股有興趣,亦會有人對分拆此等財技股避之唯恐不及。買同唔買都係自己錢,最終只須向自己問責。不過舊年開始,高明發現一種奇怪嘅思潮,就係臉書、炒股留言板,甚至財經專欄,開始瀰漫一種思潮:一、搵其他爆升股;二、然後同騰訊升幅比較,將騰訊當指標,但係又永遠唔買騰訊。高明認為呢種思潮對爭取表現有害。

有啲資產,並非人人買到,最簡單例子就係樓,因為入場門檻高,現時「每手」閒閒哋已經要400萬元,望樓輕嘆,投資其他資產以追回本港樓市升幅,其實都可以理解,但不應鼓勵,因為投資首要爭取絕對回報,其他人、其他資產升跌幾多,關你鬼事?

重申一次,本欄認為港股將會複製樓市升幅,當騰訊係太古城咁買,而買股票門檻較低,每手騰訊會值4.42萬元,香港工資中位數約萬六蚊,高明夠膽話,撇除外傭,大部份打工仔一定買得起騰訊,只爭在買唔買。如果只計買股票嘅人口,收入肯定更高,一手一手咁買騰訊,根本唔成問題。

如果落場一刻,心入面嘅目標已經係要追騰訊表現,何苦要扮勁買其他股票去追表現呢?直接買騰訊咪得囉!

過去十年騰訊長升,未有太多人用嚟做指標,直至2017年近乎一隻股撐起恒指,吸引部份人去買,但另一部份人就經常要追追追追。追嚟追去嘅害處係:跑贏表現當然本事;追唔到,時間一過,又覺蝕底咗,然後冒更大險去追,十之八九贏完又輸返,白忙一年又後悔點解唔買騰訊,陷入惡性循環。

本身另有心水,而唔係為咗追乜追物,當然無問題。但懷住追嚟追去嘅目的博其他股,不如直接買你想追嘅目標算把啦。講真,過去十年好多香港人追樓已追到氣咳,冇必要搵多條跑道令自己辛苦。

高明
https://www.facebook.com/bigricetea/

關心你飯碗,貼近你生活,即Like「蘋果ATM」FB專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2018 AD Internet Limited. All rights reserved. 版權所有 不得轉載