香港人熱愛街頭小食，同時也十分嘴刁，要得到食客的支持實屬不易。80後的阿心因喜愛街頭小食，與家人在16年創立麻甩佬狗仔粉，主打狗仔粉、鮮蝦雲吞、碗仔翅等傳統小食，憑着對多款自家製的小食及對用料的高要求，慢慢獲得街坊的支持，吸引不少食客來一食再食。
位於屯門龍門居的麻甩佬狗仔粉，記者去到現場沒有見到滿面鬍鬚，說話粗魯的麻甩佬，反而見到幾位女流之輩在打理，檔主阿心一邊招呼客人，一邊接受記者訪問，「啱啱放工呀？係咪照舊？咖喱三寶，豬皮轉蘿蔔……好多客人每星期都會嚟幫襯2、3次，慢慢都變晒熟客。原本以為係男士會較願意畀錢掃街，所以先起呢個名，不過其實乜嘢客人都有，學生、家庭主婦及後生仔女都會嚟幫襯。」
麻甩佬狗仔粉主打傳統小食，阿心對自家店內的小食充滿信心，「我哋只得外賣，營業時間由朝早11點去到凌晨1點，下晝至夜晚嘅時間就最多人。雖然我哋款式唔多，但每樣小食都好足料，狗仔粉及豆腐花最受歡迎，每日各自都賣到200碗以上。鋪頭主要由我、老公、媽咪及兩位員工打理，我同員工打理店面，媽咪及老公就負責食物烹調，不過今日老公有啲事就冇喺鋪頭。」
見阿心把小食店顧得有模有樣，其實這是她第一次從事飲食業，「細個鍾意掃街，諗過如果有朝一日開到一間小食店都唔錯，打咗一段時間工後，同屋企人提起創業嘅事，大家都支持。當要討論賣乜嘢小食時，大家都懷念狗仔粉嘅味道，加上唔係周圍都食到，會有賣點。」
造麵條試材料比例
在正式開業前，阿心在物色鋪位及食物製作上都已籌備多時，「開店前1年已經着手準備，好似周圍去唔同賣狗仔粉嘅店鋪試食，自己有買材料喺屋企試整麵條，想要彈牙得嚟又吸到湯底嘅味，材料比例都試咗十幾次。然後就搵粉麵廠訂製，湯底亦係自己調製，呢度前後都用咗幾個月。」
另外，阿心認為現時店鋪位置能做到協同效應，「心目中想搵租金冇咁貴，兼有人流嘅地點，有去過深水埗、旺角及荃灣等地方睇過，但租金太貴，而媽咪住喺屯門龍門居附近，佢話呢度人流唔錯，我哋有嚟睇過環境，最後決定租咗呢個約200呎嘅鋪位。周圍都係食肆，形成一條『食街』，雖然算係屋邨內，但經營一段時間，有時媒體介紹屯門小食時會推薦嚟呢度『搵食』，都有宣傳作用，假日時會有區外客入嚟幫襯。」
擺小販檔拎經驗
沒有經營過小食店，於是阿心嘗試在開業前去擺小販檔汲取經驗，「當時砌咗部木頭車，趁農曆新年前後同老公去咗太子擺檔賣狗仔粉，第一次準備一大煲食物，都有啲手忙腳亂。另外，我哋係整好晒一煲狗仔粉拎去賣，發現全日不斷加熱後，狗仔粉就會糊，冇咁彈牙，所以到正式開鋪時，我哋轉為每次只係整少量，賣晒再整。雖然工作係繁複咗，但質素會有保證。」
麻甩佬狗仔粉在16年正式開張，開業後阿心表示要聽取客人的意見，不斷進行改善，「租咗地方後，驚只係賣狗仔粉一款食物太單調，有推出自家包製嘅鮮蝦雲吞及咖喱三寶。不過喺經營咗一段時間後，客人反映得3款嘢食唔多夠，話有狗仔粉應該要有埋碗仔翅，於是自己去學點整，之後陸續加埋生菜魚肉湯、豆腐花及芝麻糊等小食。中間試過推出台式烤香腸及芒果糯米糍，但客人反應麻麻，而且保存困難，最後冇再賣，現時約賣緊10款小食。」
乜都親手整
食店最重要是食物味道，阿心表示保持質素十分重要，「店內嘅食物全都係自家烹調，咖喱汁自己整、豆腐花自己撞；碗仔翅需要嘅豬肉、冬菇、雲耳等材料都係我哋人手撕成絲。雖然自己製作會花多咗時間及工夫，但每樣食物推出前最緊要係過到自己個關先，好唔好食，客人一食就知，好食自然會有口碑。」
經營了約2年，麻甩佬狗仔粉在區內聚集了一定人氣，阿心目標是多開一間分店，「現在都係邊做邊學，嚟緊會嘗試推出更多傳統小食，短期目標係喺新界區開多一間分店，畀更多人可以食到我哋整嘅嘢食。」
搵好工，即上 http://www.ecjobs.com.hk
