› 選擇地區
三藩市
紐約
洛杉磯
其他美國地區
香港 台灣 北美
 
2018年06月11日

【裝修DIY】LEGO傢俬1.8萬蚊點砌法?床、凳、櫃、枱樣樣齊

最後更新: 0611 09:39 / 建立時間 (HKT): 0611 00:00

細路仔都鍾意砌LEGO積木,夢想中一定「FF」過長大後可以用積木砌間屋居住,而呢個夢唔再係「FF」,因為香港已經有人引入類似LEGO的大型積木EverBlock,可以砌牆、枱、凳,甚至一張床!令用家一嘗兒時夢想,記者亦都實測用大型積木可砌出一個家,隨時平過買家俬連裝修。

去年引入美國品牌EverBlock來中港澳台代理的蘇子賢Ivan,以香港作為首站,去年9月先入一櫃貨試水溫,結果立即大賣。由於產品美國製,體積又大,運輸需時,第二櫃貨已經要到今年頭才運到香港,客人遍佈商家、學校以及住宅,目前分出售及出租兩種,一件最大12吋x 6吋的Block,售價84元,最細的3吋x3吋38元,價錢並不算便宜。

Ivan解釋賣點是可塑性及易於變動:「例如有客人生咗BB,用嚟砌間房出嚟,隨住BB年紀長大,間房可以變大啲,張床又可以變長啲。」成本方面,他強調只要改動多過一次,用積木砌會較化算:「如果你裝修砌幅牆出嚟,間一間房成本大約1萬元,用EverBlock大約1.5萬,但如果將來想拆咗間房,或者間大啲,咁用block一定會平啲,同埋慳時間。」他又透露,有居住村屋的客人買Block,用來於天台砌家俬,因為非固定物件,因此不屬僭建物。客人可上官網,透過3D Virtual Builder 程式,自動用軟件砌出心水模型,網站會顯示使用了積木的數量及價錢,讓買家預先設計圖紙。

EverBlock看似LEGO,但其實LEGO的interlock技術專利已經結束,而且EverBlock的配件用方形點,跟LEGO的圓形亦有所不同。去年一條用積木砌出兩間房的短片熱爆網上,Ivan於是傾代理權,引入香港,今次投資逾200萬元,目前出售收入佔八成,不過Ivan認為未來出租的利潤及收入增長會更快。出租目前固定是首日租金為售價兩成,其後每日租金為售價5%,運輸連安裝為售價10%,假設租用block擺放展覽3日,合共是售價的40%,他表示:「我成日同啲客講,如果你用多過一次,不如買咗啲貨!」

EverBlock積木共有16種顏色,7款不同形狀,最近更推出地板,望落好像放大版LEGO,每塊BLOCK重1公斤,十分硬淨,砌起來和砌LEGO無方別,但屬易砌難拆,記者亦實測在不足200方呎的地方,模擬一間套房,透過積木砌出全屋家俬,當中包括L形牆、床架、飯枱,電視機櫃以及兩張凳。

首先在劏房中砌L形兩幅牆,用作間房之用,兩人砌出一幅6呎高的牆花了不足半小時,砌牆亦有技巧,需在底部砌出「工字形」,才有足夠承托力,體重200磅的男士爬上積木牆,亦十分穩陣。價錢方面,兩幅牆共用了90個Block,大約7,560元。一張凳用了6個Block加兩塊板盛惠600元,價錢不菲,但勝在玩味十足,兩張細凳亦可隨時合體為一張大凳。連同床架、飯枱及電視機櫃,全屋家俬合共花費約1.8萬元。

EverBlock裝修清單:共 $18,090
牆用 $7,560 (90 Full Block)
3呎單人床 $4,536 (54 Full Block)
飯枱 $2,688 (32 Full Block)
電視機櫃 $2,016 (24 Full Block)
凳 $600 -$690 (6 Full Block + 配件)

記者:陳新政 余曉芸
攝影:晉平安 黃偉傑
剪接:林家鴻

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載