› 選擇地區
三藩市
紐約
洛杉磯
其他美國地區
香港 台灣 北美
 
2018年07月12日

【年金抵唔抵?】年金公司新專欄:活到90歲有5%回報

年金公司設專欄推廣年金。(蘋果日報)
建立時間 (HKT): 0712 15:29

公共年金下周四(19號)開始認購登記,年金推出後爭議不斷,坊間出現大量回報計算方法。香港年金公司總裁劉應彬都要捲起衫袖,執筆落場寫專欄《老劉筆記》回應。《老劉筆記》首篇文章即把年金與定期存款、股票投資作比較,強調年金比定期存款提供終身保障,相比股票則有保證回報,且若投保人夠長壽,回報率亦可達5%。

相關新聞:【名家搶先睇】年金計劃猶如雞肋(神仙丁)

《老劉筆記》全文如下:

最近終身年金出爐,全城熱烘,同世界盃都有得比,有好多人都為咗呢樣嘢發表評論,咁都係好事,多啲觀點,多啲角度,等我地班老友記諗清楚先好買。不過大家都要小心留意,有啲睇法同分析係基於理解有誤,又或者將橙同蘋果做比較,老友記如果照單全收,就可能誤咗「終身」大事。

相關新聞:【經濟客飯】食店紙巾點解要收錢?(曾國平)

例如,我老劉最近見到喺網上瘋傳一個意見俾啲老友記,就係話不如將$100萬放喺銀行做定期存款,以依家存款利息高達2.15厘計,利疊利滾存20年到85歲可連本帶息攞番$153 萬,好過買終身年金,同樣到85歲只可收番$1,392,000。對於呢啲「精明貼士」,我第一個反應就係,將錢放喺銀行原封不動20年做定存,咁樣豈不是變咗失匙夾萬,一個仙都無得使?我地做比較要均真啲,終身年金係你投保咗$100萬係佢嗰度,你下一個月就可以每個月攞$5800(以65歲男士計)直至終老。如果有位65歲嘅老友記將$100 萬去做定存,但需要每月喺存款度攞$5800做退休使費,以2.15厘嘅存款利息計,佢呢筆存款喺17.3年後(即82歲)就乾塘,無以為繼。但終身年金就唔同,只要你仍健在,當你到82歲甚至更後嘅時間,你都可繼續每個月攞$5800,愈長壽,回報就愈多,就算真係「長命120歲」,都唔使擔心「坐食山崩」。

另外,呢位仁兄又話就算比你活到90歲,買咗終身年金都只係攞到$1,740,000,25年只係賺咗$740,000,等於年息 2.9厘,不如買滙豐或公用股啦。香港人最緊要有得揀,我老劉絶對唔會反對人買股票或其他投資產品,只要考慮埋當中風險。首先,我仲未見到市場上有保證回報嘅股票。仲有呢個2.9厘回報又係基於一個錯誤嘅假設,就係將呢$100萬嘅本金原封不動放喺度25年去生息。如果好似終身年金,喺第二個月就可以每個月攞$5800出嚟用,長攞長有,計埋呢個現金流,其實呢位65歲嘅投保人到90歲時已享有5%的回報率,而唔係2.9%。

講咗一大餐,其實我只係想話,老友記買唔買終身年金都係要諗清楚自己嘅需要,仲要小心分析吓人哋嘅「分析」!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載