› 選擇地區
三藩市
紐約
洛杉磯
其他美國地區
香港 台灣 北美
 
2018年08月22日

【中佬創業】蛋糕師寫字醜?四條佬夾300萬 研「蛋糕字機械手」

四位工程系出身的「麻甩佬」,四年前看中這個機會,研發「朱古力寫字機」Chocoquill創業。
建立時間 (HKT): 0822 00:05

隨科技進步,生活上所有事物都趨向自動化。自動化機械不但為工作帶來方便,亦都可以為生活帶來不少情趣。而四位工程系出身的「麻甩佬」,四年前看中這個機會,決心研發「朱古力寫字機」Chocoquill創業!

陳家榮、袁偉基、顏昭能、顏昭域四個工程佬,本來於2014年開設自動化機械公司IHP,後來一次與客戶交流後,發現其實市場需要一部寫朱古力的機械手!陳家榮(Wayne)指,「一個蛋糕最重要其實係塊牌,塊牌唔靚或者寫錯,成個蛋糕鑲金又好,人地唔理你㗎啦。」

他表示,寫字機的賣點在於「你手寫你心」,「蛋糕師傅一天可能要寫幾百個字,你可唔可以保證,寫咗8個鐘頭後,寫出嚟係一樣呢?不過我哋部機唔使唞。」寫字機不但不會手軟,更提供不同字體,即使一個普通香港人都可以在蛋糕上寫一手好韓文。

朱古力寫字機用法十分簡單,在應用程式上畫上圖案或寫字,然後將數據傳送到機器中。再放入食物,在機器屏幕上調教合適的大小,就可以打印,整個過程約1分鐘。研發四年,朱古力寫字機來到第五代,包括利用AI分析及鏡頭模擬蛋糕師傅的動作,甚至將朱古力唧上曲面都不會流走。事實上,市面上的3D打印技術,亦可以做到類似較果。講到「對手」,Wayne指,3D打印機比Chocoquill的速度更慢,味道更差。

四個「男人老狗」搞朱古力機,要下的苦功,當然不止同機械玩遊戲。他們透露,為求造到「好食又好睇」的朱古力寫字機,曾拜訪多個師傅學習製作朱古力。顏昭能(Charles)笑言,「整呢架機之前,我以為朱古力咪就係得嗰一款。」他強調,要確保機器暢順運作,同時唧出的朱古力好食,一定要先了解朱古力的可可脂及糖的份量!

又要搞機器,又要造軟件,研發歷時已四年,四人大大話話已為一部機器,夾份投入300萬元,今年才僅僅收支平衡。Charles慨嘆,四人不是有錢人,為搞科技都要「勒緊褲頭」,慶幸的是大家另一半都諒解,「Wayne老婆又要減家用,其中一個Director嘅太太,更願意以借錢形式投資落我哋公司。」

Charles坦言,目前項目仍缺乏投資者。他們雖曾帶Chocoquill參展,但外界反應佢抱觀望態度,「好多都話我哋部機速度同體積有待改善,未來我哋會著力解決呢兩個問題。」他預期,產品至少需要多200萬元,才能正式推出市場。雖然產品未正式上架,但現時某大型西餅店已率先購入兩部,「2017年第一次買咗一部,用咗年零就再買多部,佢當係啲秘密武器收埋,唔想比人知。」

記者:蘇承智
攝記:晉平安

全球樓行 Dream House零距離
https://hk.feature.appledaily.com/overseasproperty

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載