蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月04日

【講你波士】陳志雲打工生存筆記:蠢嘅老闆最難頂!

147,698
最後更新: 1004 13:03 / 建立時間 (HKT): 0905 21:00

不少人對陳志雲印象就是傳媒高層,商台、TVB,又再商台,但高層對上仍有老闆,老闆在上高層亦只是個中層,超過廿年管理經驗,從俞琤的「屎堆尋鑽石」到TVB「山頭文化」,他亦應付自如,多年經驗積慮下來,就讓他來教你如何做好一份工!

在辦公室環境中,上司「成本控制」、下屬「山頭文化」、「老屎窟」、「老鼠屎」等等,如何拆彈?

說到成本控制,曾從事採購的TVB前行政主席方逸華令陳志雲獲益良多,現為商台首席智囊陳志雲指出,她有多年採購經驗,「可能睇到一啲我哋睇唔到嘅嘢」,有時覺得某物品有價位,亦會親自去致電「講價」。

他認為:「你當呢個係你生意,每一分每一毫都係自己錢。」就會知道如何應使則使。

TVB是出了名存在山頭文化, 當年陳志雲一初加入TVB主要處理續牌,要接受傳媒訪問,經常被質疑「你入咗嚟幾耐呀,代表TVB,講你就天下無敵,做你就無能為力!」當時的他內心亦武裝起來,「我可能係唔識做,但你製作咗個節目好唔好睇我識,咁等如我可以唔識掃地,你掃得乾唔乾淨,我都會知。」他惟有用這個心態去面對。

但在處理上,他亦自己有一套方法,就是以工作賺取人家認同,「同事與同事之間,或者山頭與山頭之間,如果你幫到手嘅話,佢唔會排拒你嘅」,他說「嗰間機構(TVB)裡面,就算到今日都仲有好多好有心嘅人想做好啲嘢。」當人感受到你的處事態度,「山頭」是可以克服的。

「老屎窟」亦是延伸出來的管治問題,「有啲人唔係佢唔勤力,但係唔係努力緊佢應該努力嘅嘢。」他指出,只是職級上未必是他應該要做的事,作為管理層需要將他重新「抽出來」做回他應做的事。

「如果佢真係做唔到?你就要坦白同佢講,無論佢做咗幾耐。」但作為管理層,他認為亦需要自我檢討「點解你升佢而佢做唔到?咁即係話你判斷有問題。」所以怪責他之前,先要怪責自己。

「老屎窟」形成,在陳志雲眼裡是人性表現,當知道自己到了極限的時侯,不希望被人「爬頭」,或者自己地位被威脅,「但係呢啲人上面,都仲有個老闆,如果老闆容許佢擋住下面嘅人,即係老闆都唔夠叻囉。」

除了「老屎窟」之外,大機構好多時候亦會有「老鼠屎」,陳志雲認為對付這種人就要手起刀落,「你要搵啲屎出嚟,即係如果Perform(表現)唔到,即係阻住地球轉嗰啲,就唔好要。」
處理「老鼠屎」有時甚至是公司架構重組,管理層都會要作出炒人的決定,如何交代亦是難題之一,陳志雲認為,這惟有直接說出「人對人真心去交流去講,佢會明白嘅,即係唔好對人有任何侮辱成份。」

有兩類同事,陳志雲覺得最反感,其中一種是種種理由說不行的同事,「我有一樣嘢搵你幫手做,你畀10個理由我話唔做得,我就好憎。」他說:「個機構請你返嚟係幫手做啲嘢,你知點解做唔到,咪去解決佢囉,你解決唔到咪出聲大家一齊諗點解決囉。」第二種就是「呢樣唔係我部門負責」的同事,他說:「你依家好大咩?好多個部門咩?你咪同負責部門溝通囉。」

至於最難頂的老闆,陳志雲毫不猶豫地說:「係蠢既老闆!每日同佢做嘢,你唔覺得叻咗,你覺得畀佢拖低咗。」

記者:張活儀

影片:
採訪:張活儀 倪敏慧
編撰:倪敏慧
攝影:卓振輝
剪接、後期:梁智威
編導:梁智威
編審:陳家文

全球樓行 Dream House零距離
https://hk.feature.appledaily.com/overseasproperty

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載