蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月05日

【講你波士】俞琤身上學管理 陳志雲:佢最想你同佢嗌交!

80,308
建立時間 (HKT): 0905 21:10

政府AO走到商台、再轉戰TVB後,又重掌商台,傳媒工作超過三十年的陳志雲從商台俞琤,至TVB方逸華手上均活下來,職場打滾多年經驗積慮,足以編寫出一本職場秘笈。

走進現出任首席智囊的商台辦公室,談到他與當年一手由政府「撬」他過檔的俞琤, 工作上俞琤就是喜歡下屬「同佢抝」,最重要的是有道理,陳志雲回憶當年俞琤掌管的商台,「每逢商台有咩大動作,未出我都一定知…佢把聲一定沙晒」她就是會與人辯論,給予一些相反意見。

他回想起當年「我記得有一次,唔知兩三點,已經凌晨好攰,佢(俞琤)都已經說服晒我喇,但佢忽然又話,唔係喎你頭先講嗰點可能有啲道理,我話,唔係吓嘛,又嚟過?」這樣就可以從「一堆糞便中搵到一粒鑽石」,但作為管理層亦要有謙卑的心。

事實上在TVB時期亦有類似經驗,當時他一位同事,「佢開會都用好唔客氣嘅說話同我講嘢…即係佢當咗我係下屬咁…但係我就無問題嘅。」不過有一次兩人「抝」得激烈,事後陳志雲向他發電郵「我話,啱啱可能大家覺得咩呢…佢竟然接納我道歉!仲叫我下次唔好添呀…哈哈哈哈哈」之後再補上一句「但佢真係覺得佢自己無錯。」

管理怎能以一招行走天下,這亦演化出陳志雲自己的管理哲學,激勵亦是很重要,在管理一些創作者,天賦才能高的人以至做藝術工作的人,是很難管理。「因為佢哋大家嘅ego,自我都好大。」

他舉例:「人有人性架嘛,我講10個新嘢,你9個你都話唔好,咁我唔講囉。」這樣你可以選擇引領方向,「令到佢自己覺得個creative idea係佢自己嘅。」

但早在管理之前如何覓得人才亦非常重要,這方面陳志雲在俞琤身上得著不少,「YT(俞琤)搵一個人入嚟做嘢,我相信佢係好多方面嘅觀察。」陳志雲解釋因為她是一個思想非常透徹的人,「如果係佢自己搵返嚟嘅工作夥伴,佢會有好細心嘅觀察,呢點我都响佢度學到好多嘢。」

知人善任很重要,「作為一個管理層,「越高級就越要知同事嘅長處,盡量要找出同事的特性。」與此同時,「每一個人都有短處,咁就要用其他人去彌補佢。」更加要下放權力,他又引述媽媽小時候教導:「千祈唔好話你唔使靠人,因為你死咗之後,都要有人抬你出去。」
做到知人善任之後,層次進一步提昇至破格提升,他認為,破格提升,有三個好處,一是可以刺激到下面有能力的同事,二是整個機構文化有一個自己互相競爭文化,三就是破格提升的人對你亦有忠誠度,因為是你一手提攜他的。

對於下屬的升職加薪亦是管理層面對的難題,「我覺得如果要我出聲加人工,我唔會開心。」陳志雲說:「如果員工要出聲同你講加人工嘅話,我諗你都要檢討吓,點解要佢出聲同你講加人工。」

人才流失亦是個問題,「咁我先要了解佢點解想辭工,睇吓佢原因,有無嘢做到令佢有意留番喺度。如果真係無嘅都無辦法,唯有希望第日有唔同範疇裡面大家可以再合作。」不過,他認為作為管理層「你都要問自己點解你唔知佢會想走。」

「永遠如果你做管理層最高,你永遠有個自己問責先,點解佢要同我講…佢嘅表現我自己觀察得唔夠?先要問咗自己。同埋溝通好重要,會事半功倍。」

記者:張活儀

影片:
採訪:張活儀 倪敏慧
編撰:倪敏慧
攝影:卓振輝
剪接、後期:李楝芬
編導:梁智威
編審:陳家文

全球樓行 Dream House零距離
https://hk.feature.appledaily.com/overseasproperty

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載