› 選擇地區
三藩市
紐約
洛杉磯
其他美國地區
香港 台灣 北美
 
2018年11月06日

【搵食】打破乞食魔咒的藝術家

最後更新: 1106 00:18 / 建立時間 (HKT): 1106 00:05

別人都說做藝術家搵不到食,黃志豪(Noble Wong)偏不信邪,兩年前放棄月薪數萬元的IT工作,當個全職畫家,為餐廳、商店、發展商及中環大館畫壁畫,目前收入夠租樓生活,儲錢旅行游刃有餘,雖未能置業,但街坊與遊客對其作品連聲「好靚」的讚美,帶給他的滿足感勝過一切。

跟Noble傾談兩小時,他說得最多的是「機遇巧合、好好彩、咁啱」,他從沒想過當藝術家,沒修讀藝術課程,只是從小喜歡畫公仔,老夫子、日本漫畫、日本明星均是他的消閒作品,大學畢業後在銀行從事IT工作,更把畫畫興趣擱在一旁。直至五年前,認識一班志同道合的人,每星期組織戶外寫生班,他才重新提起畫筆。

「第一次去畫中環舊樓,大家互不相識,坐喺路邊,係咁畫」自此,Noble每個星期也跟大隊去寫生,在南生圍、大澳、郊區留下不少鉛筆碎,他將每幅作品放上Facebook以作紀錄,想不到因此獲得中介與客戶注意。

「第一單job係地產商想搵人做酒店decoration,試咗幾幅,最終無做到,但收到錢,經過個process,知道點樣傾,起碼知道要去開番個銀行戶口。」之後就有一個蒸餾水品牌為周年紀念,委託Noble為包裝紙及紀念套裝畫插畫。

去到2016年初,中環「大館」需要畫家畫場內壁畫,雖然Noble當時沒有太多經驗,但為興趣豁出去,辭掉IT工作,全身投入大館項目。2016年尾又有份參與「城市閘誌」活動,為本地老店的鐵閘畫上獨特故事。

Noble當年負責為灣仔「利工民」畫鐵閘,他坦言「開始時無咁大信心,以往畫開A4 Size,買咩油,用咩筆都唔知…又怕整污糟旁邊舖頭」他勝在不恥下問,請教有經驗的行家,反正頭已洗濕了,「做落又唔係咁複雜」。

這項目為他帶來前來未有的滿足感,「因為喺電車路旁做,街坊行過話好靚,自己好開心。每次做outdoor都有呢個感覺。」今年十月上旬,他為一個發展商在西營盤的樓盤畫壁畫,星期日開工,他笑著說「成日聽最多就係好靚呀,隔十分鐘聽到一次,啲人又係咁影相…呢個job對我來講好滿足」說時,他那份喜悅充滿感染力。

但香港人現實,滿足感重要,開飯買樓更重要。Noble以前做IT,月薪數萬,安安定定,轉做藝術家接job,插畫每單幾千至幾萬,壁畫則萬多至數萬元不等。「有時一兩個月無job,或者見好多客,最後唔成事,但拉勻計ok。例如呢個job (樓盤壁畫)幾萬蚊做十零日。」

他指,目前收入夠生活,去到旅行,儲到錢,「只要唔好要求又供樓,又養家,又養細路就ok!」他慶幸拍拖十年的女友不是港女,養得起自己,無要求買樓,十分支持他做藝術,知他趕工,甚至請假幫手,為壁畫填顏色。

再配合天時地利,他對前景挺有信心。「十年前,無乜人留意壁畫、street art甚至係插畫,到呢個項目都話整靚條街,好多人來打卡,越來越多人留意……個trend係上緊,見到機會。」他希望,一邊做一邊累積作品,「可以繼續畫畫,就係我嘅目標,Afford到基本生活,有尊嚴嘅人生,咁就ok」。

記者:高淑嫻

全球樓行 Dream House零距離
https://hk.feature.appledaily.com/overseasproperty

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載