› 選擇地區
三藩市
紐約
洛杉磯
其他美國地區
香港 台灣 北美
 
2018年12月09日

【BizStarter】裝修佬創業 老婆不離不棄!捱出頭獲千萬融資

建立時間 (HKT): 1209 00:00

有人靠伴侶建功立業,有人為伴侶放棄飄泊。曾詠文(Andrea)五年前認識Andy的第一印象是:「覺得佢已經係一個成功嘅老闆。」未婚買樓,按揭遲遲未批,逼到男友自爆官司纏身。真相在前,她沒晴天霹靂,沒聲嘶力竭,只淡淡然地說:「有問題就解決。」

相關新聞:【BizStarter】靠無聊Game撼贏騰訊!Voodoo手遊 上位靠三招

Andy創辦的公司最差試過半年無糧出,她是時裝設計師,當時她轉到新公司,跟個像嫁了給公司的韓籍單身女人,即使恐怖到要返朝九晚二,仍死頂5個月,無非撐住頭家。

3年,好彩只是3年,男友變老公。當初Andy忽發奇想的「我要裝修」網站變成「裝修佬」靈魂業務之一,現在成為「裝修佬」合夥人,今天獲千萬融資,叫修成正果?其實笑到最後才是贏。

相關新聞:【BizStarter】拆散老婆勞力士 婚攝師變製錶師:有一隻賣過百萬!

Andy名叫劉天生,父母在他幼年分離,媽媽替他改名「天生」,天生天養,期望順應天命,卻培養出「我命由我不由天」的不信命個性。細時唔讀書,大個駐內地賣牆紙布藝,男老闆將他視如己出,送西裝,委以重任,他視老闆如爹,公司如家。2011年家變,老闆找姪女接班,自覺鞠躬盡瘁卻被屈做二五仔,那刻除了哭,便是哭。

「趁後生」、「唔做會後悔」、「創業失敗大不了返去打工」朋友縱容的字句不知午夜夢迴多少遍,公司新接班人一句:「千祈唔好咁信任某一位同事」更觸發他中年危機提早降臨,「如果我人到中年,佢因為呢句說話炒我,我就兩袖清風」,遂萌生創業念頭。

以為後生輸得起,卻可能輸到貼地。夥拍舊同事另起爐灶,稚嫩地跟舊公司賣相同產品,「就係咁樣瀨嘢,瀨嘢就係公司覺得我搶咗佢嘅資源,出嚟撬佢啲客。」舊公司向他們作出起訴,人生第一次收到律師信那刻「騰晒」。官司纏繞5年,過程煎熬,他深信「佢(舊公司)係諗住滅咗我哋。」最終疑點利益歸於被告,這單官司共消耗他們十多萬元。

前度女友不是大難臨頭各自飛,Andy沒怨恨,只怪自己當時:「收入唔穩定……無糧出係煎熬,好多人經歷唔到……佢(前度)屋企人覺得打份工仲好啦…」七年感情告終,「令我更堅定係創業呢條路上,始終有個唔服輸嘅心態。」


自我隱閉半年,重拾心情朋友聚會,認識Andrea,同是天涯淪落人,Andrea笑著懷緬對他的第一印象:「陽光」、「正氣」、「覺得佢已經係一個成功嘅老闆」,慢慢知道是一人公司的老闆,「嗰下無乜嘢。」

打得火熱,未婚買樓,聯名以約280萬元買入深井豪景花園一個兩房單位,君子協定講明合作投資,日後分手賺蝕均分,一成首期九成按揭,問題來了,銀行遲遲未批按揭。Andrea回想:「有一晚,佢半夜捉我傾計,因為果時銀行一直未批我哋按揭,佢話其實我有單官司同舊公司有關,導致做唔到按揭。嗰下我嘅心情係,嗯…有問題就解決。」

回想當初困局,訪問當刻不禁流淚……Andy仍記得那時的感覺:「嗰時我好驚訝,點解唔同一般女仔好激動咁嗌晒分手。嗰時剩係諗,如果撻定,點同佢屋企人交代。」最終不知前世做了甚麼好事,Andy有位好朋友借50萬元給他渡過難關。

官司由2011年纏到2017年,Andy公司又大半年無生意,Andrea說:「明明月頭畀家用,但去到月尾或月中先畀,越嚟越遲畀,點解唔可以早啲?點解咁遲嘅?」後來無意中知道男友無糧出好耐,「開始驚,開始擔心,擔心佢無嘢食、無錢搭車。」

守株待兔必餓死,Andy決定開多「我要裝修」網站,一個提供予住戶與家居裝修公司的配對平台,從事斡旋工作、提供裝修知識等等。Andrea稱:「唔理啦,是但啦,盲目支持佢啦!」報讀autocad,替他網站設計商標。

「我要裝修」網站運作半年零收入,不如搵份工打下?Andy坦言:「定咗條線畀自己,如果一年後再無乜起色,就真係考慮放棄啦!」、「咁多年一路創業,覺得如果影響自己無所謂,但影響到身邊人,覺得超內疚!」他續稱:「好似望唔到前路,創業搞到自己生活唔穩定,想為另一半提供穩定的生活。」

Andrea插咀:「佢成日都動搖,但每一次支持佢!因為我知道佢創業呢條路,當初落決定已經好難,願意去行,捱咗咁多年,當中一定會有問題,有問題咪解決囉!同埋我覺得自己好自私,佢要返去做打工仔背後係因為呢個家、因為我嘅話,未至於囉!既然選擇得同佢一齊,應該係一齊去行呢條路。我有做嘢架嘛,所以我份工係唔可以無。」所以當時跳槽新公司,韓籍單身女上司似嫁了給公司,捽到她很多天工作時間是朝九晚二,仍捱足5個月才回巢母會。

「咁我愛呢一個人嘛,我鍾意得佢,我就接受佢呢樣嘢,你選擇得同佢一齊,你知道佢背景,你就要支持、包容,盲撐就梗!」

準備放棄「我要裝修」之際,同行「裝修佬」出現拉攏成為合夥人,聯同「裝修防伏專家」、「裝修華」成為裝修網站平台的三大業務,令「裝修佬」平台提供更多服務,包括家居裝修配對、裝修DIY、網上商城、品牌及產品宣傳推廣。

發展2年多,裝修佬獲得投資者融資,Andy開懷地說:「係一次性投入8位數字資金,畀我哋繼續發展。可以講收成正果,確定平台發展方向係可行。」獲得資金後優化業務,例如配對系統智能化、裝修商城由線下擴展到線下,在屋苑提供裝修用具及產品自動售賣機。

由一人公司到被賞識做合夥人,「One man band係辛苦、係蠢,創業真係唔好one man band,玩死自己!」創業十年,無時無刻想過放棄,但最終真是天生自有天養,「每當經歷低潮,都諗呢個決定係咪啱,其實返去打工可能更加舒服,因為天冧落來都有人幫我頂,唔需要我去諗解決方法,但創業係帶畀你無限嘅樂趣。當你跨過一個難關,諗返轉頭,咦!原來當初嘅難關,我差啲失敗,差啲就返去打工。」

採訪:陳家雄、余曉芸
撰文:陳家雄
影片編撰:余曉芸
攝影:馮峰 卓振輝 釗@realfinder
剪接:劉曉彤
編導:李楝芬
編審:倪敏慧

investMAN
For People of Style & Substance
掌握理財智慧 感受生活品味
http://facebook.com/investMAN.hk

【BizStarter】靠無聊Game撼贏騰訊!Voodoo手遊 上位靠三招 【BizStarter】拆散老婆勞力士 婚攝師變製錶師:有一隻賣過百萬! 【BizStarter】美聯六君子自立門戶 創網上平台「免費放盤」「免拆佣」 【BizStarter】米芝蓮老闆的ABC餐 「我求個洗碗阿姐唔好走」 【BizStarter】創炒散App做女強人 一切由酒開始 【BizStarter】千億市場三大影響!外賣App出現 康師傅中箭 【BizStarter】靠賣Bra食糊!網購平台MyDress:年收入過億 【BizStarter】靠租Wifi蛋年收入二千萬!爽Wifi李垣:失敗唔可以賴同事 【BizStarter】大生銀行「富三代」 中環賣珍珠奶茶:日賣500杯就回本 【BizStarter】25萬創業!港產音響品牌 成功殺入東京 【BizStarter】大學生停學為創業!開補習平台 年賺100萬 【BizStarter】科幻成真!「見工機械人」面世 取代HR? 【BizStarter】曾為李嘉誠做西裝!名人裁縫70歲再創業:我沒打算退休 【BizStarter】創業,因走投無路!拍檔走數累欠債 WiFi 公司老闆:對唔住老婆 【BizStarter】會考0分藥房仔 700萬開6舖 「海鮮價劏客係殺雞取卵」 【BizStarter】夾公仔機變「死場救星」 租機做「台主」 每部月入萬元! 【BizStarter】𡃁模付「律師」逾10萬創業 推智能合約程式 大狀:問題多多 【BizStarter】四年晉身「獨角獸」!Airwallex融資曾受挫 騰訊、紅杉資本成「救命稻草」 【BizStarter】80後港男四球搞算命App 夥麥玲玲玩玄學配對 【BizStarter】「物流二代」鬥氣搞智能櫃 網購自取 創千萬生意 【Bizstarter】出貨慢成本高 「眼鏡裁縫」堅持手製:曾為無耳殼客人設計 【BizStarter】「雙失中佬」做男網紅翻身!直播賣女裝鞋 兩日沽清1600對 【BizStarter】創作的核心是「求變」 名設計師楊德賢:我支持學生 【BizStarter】九龍表行太子爺 棄祖業研智能戒指 半年售過萬隻 【BizStarter】一條蹺打動舖王波叔 市價三成平租銀城 搞「KOL格仔舖」 【BizStarter】醜小鴨變天鵝 港女研護膚品自救「平大品牌一半 成份九成似」 【BizStarter】金融雙妹嘜 辭工創平民版「畢菲特午餐」:冇咩蝕,why not just try it?
關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載