› 選擇地區
三藩市
紐約
洛杉磯
其他美國地區
香港 台灣 北美
 
2019年02月11日

【大棋局】貿易戰好戲在後頭(Mr.Tregunter)

建立時間 (HKT): 0211 18:00

無論特朗普定習近平,此刻都需要貿易戰和談結局。郤正評價姜維時講過一句話:「凡人之談,常譽成毀敗,扶高抑下。」意思係人通常以結果倒睇前因。特朗普上任後腳踢四方,如果最後貿易戰傾唔成,美國經濟又受損,自然會有一種聲音鬧佢搞咁多嘢得個桔,而非看待其戰略判斷是否正確。習近平面對的情況亦如是。

相關新聞:【操盤手札記】送手股票畀情人(割柑人)

貿易戰估計會斬件收場。即美國要求中國改革的事項,就算同一範疇內,最終只有部分傾得成,關鍵在錢搞唔搞得掂。美國的要求可概括為五大範疇,第一為消除貿易赤字,相信會完全解決,中國會大手買美國頁岩油、天然氣、大豆等等。

第二範疇知識產權。產權可以買賣,偷即係唔畀錢。只要中國畀錢,落實保障美國公司的知識產權,這部分可以傾得成;但畀錢美國都唔賣的技術,中國唔可以再用各種方法奪取,這部分文書協議其實約束力不大,就算表面傾得成,日後亦會再起風波。

相關新聞:【何車500】9倍預測PE 5G股(何車)

第三範疇貨幣政策。傾各種協議,如果中國一個屈尾十好似94年將人民幣貶值四成就白做,所以貨幣政策問題也就係人民幣唔好貶值,其次為開放資金進出。早期當然可以,但當中國貿易順差減少,外滙漸少,人民幣就算相對封閉,其價值亦係市場話事。就像以前人民幣官方一個價,黑市會另一個價。

第四範疇消除不公平貿易,開放市場。所謂不公平貿易,例如外資在中國公司的持股比例、強迫外資以技術轉移換取市場准入等。外資持股比例,相信會以負面清單形式陸續開放不同行業;強迫技術轉移,有得傾,但有得傾唔代表會解決。中國人做事方法,可以承諾不強迫技術轉移,但用其他合法藉口否決外資合營,等外資自己識趣用技術交換。到時話係外資自己提出,冇強迫。

第五範疇國企及政府貼補。古時封邑食祿,現代封企食祿,國企其實就係一方諸侯。諸侯之其一作用為拱衛皇權,國企市場化等於削藩,皇權掌控力下降,所以現時冇可能改;政府補貼,部分比較閒的業務有得傾,但像中國製造2025唔會有得傾。

上述五個範疇由易到難,貿易戰一旦斬件收場,代表錢能解決的都做了,剩下為錢不能解決的,這部分其實先係戲肉。去年11月估計股市醞釀大反彈,結果時間錯了,恒指再打雙底先上。反彈好少超過跌幅一半,即28500差唔多,宜準備走人。

Mr.Tregunter

10萬蚊 100人分!
星期一至五晚上10點半
《動腦Q》Let's Q the money!
http://bit.ly/2QW8LcI

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載