蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月12日

【冠軍分析師】拆解領展只升不跌之謎 「長遠應該買入」

21,786
楊海全亦指出領展企業架構有利股價,不同其他發展商擁有大股東,領展董事局大部份都是獨立非執行董事,而行政總裁王國龍(圖)花紅與股價掛鈎,有利為股東爭取最大回報。
建立時間 (HKT): 0212 00:03

領展(823)多年來無論經歷任何風浪,股價總會輾轉上升,猶如沒有周期性可言,近月被投資者視為紅底股在望,而這隻股票亦是花旗4隻首選地產股中,唯一非發展商,花旗中國香港地產研究主管楊海全認為領展長遠值得買入,「可以長時間放籠底,因為10年之後已經升好多」,又形容領展是公用股,「佢就係一隻煤氣(003)」。

相關新聞:【冠軍分析師】地產股「超級跑贏大市」 黑天鵝出現仍可享「最後一升」

楊海全形容大部份行業板塊均有周期性,包括地產股,需要採取見底買、見頂沽策略,「咁周期性嘅股票入面,竟然有隻逆周期嘅,即係無論經濟好經濟差,股市好股市差都係升嘅,你可以當領展係煤氣,佢就係一隻煤氣。」他續說:「我個人覺得屋企有人都可以買(領展)。」

楊海全解釋煤氣特色是「經濟衰退,人都要沖涼」,擁有不少屋邨商場的領展,其故事則是圍繞基層市民工資會否增長,「領展掂,因為最低工資已經係政治情況,經濟差可唔可以減最低工資?大家都攞緊立法會票,即係已經係每年加5%最低工資嘅必升通道。」

相關新聞:【冠軍分析師】花旗楊海全:兩大原因下季起樓市急升

他形容香港已經進入福利社會,「低薪嗰啲市好市差都要加人工,如果住公屋嘅平均每年加5%人工,理論上可動用收入可以加8至9%。」原因是公屋住戶毋須交稅、使用公共醫療系統、教育使費低,「結論係使嘅錢會多咗,如果喺樓下嘅商場食多咗嘢,商場都會受惠銀包鬆動。」

楊海全亦指出領展企業架構有利股價,不同其他發展商擁有大股東,領展董事局大部份都是獨立非執行董事,而行政總裁王國龍花紅與股價掛鈎,有利為股東爭取最大回報。

楊海全預期領展未來3年每年股價升8%至10%,「佢一定會放慢嘅,但每年點都做到6%至7%(升幅),再加埋超過3%嘅股息率,總回報10%,去邊度搵啊?」至於買入時機,他提醒投資者領展調整時機在4月至5月,因為業績期前緘默期將有一個月時間未能回購,「通常對沖基金好鍾意呢個時候沽佢,呢個時候可以買入。」

記者:周家誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載