› 選擇地區
三藩市
紐約
洛杉磯
其他美國地區
香港 台灣 北美
 
2019年03月07日

【專訪】伴癌母出入急症室 見人生百態 投行巨子轉戰險企除弊端

建立時間 (HKT): 0307 00:00

畢業於芝加哥大學,貴為投行科技部門研究部主管,今年未到40歲的郭彥麟(Alvin),或許可以在金融界更上一層樓,不過他毅然離任,源於伴隨母親出入醫院的經歷,「我媽媽2014年癌症late stage,嗰時出入醫院急症室,見識到成個醫療體系。」公立醫院人生百態,有人等候7小時看病;有人未能順利獲保險公司賠償,急於向財仔借錢,他於是創立保險公司OneDegree,希望解決保險痛點,讓更多病人購買醫保,有能力到私院求醫。

相關新聞:【專訪】OneDegree夥拍信諾 網銷醫療保險

網絡世界有一套著名理論Six Degrees of Separation(6度分隔理論),兩名素未謀面的人士,最多只需6個連繫就可以相互認識,這項理論廣泛應用於保險界,不過投保人士與保險公司似乎不止6度隔膜,互相理解困難重重,郭彥麟說:「我哋想做到one degree(1度),即係你同我冇隔膜。」

甚麼事令郭彥麟認為保險公司與一般人存在隔膜?原來2014年時,郭彥麟母親癌症末期,他經常出入急症室,眾生相令他感受猶深,「我記得其中一晚,10點半入急症室,跟住有廣播話:『3點排籌嘅病人請耐心等候』,呢兩個月好多流感,急症室好多order,呢個其實唔係一個流感現象,係一個常態。」

急症室人潮擠擁是常態

「點解啲人唔去私立醫院,而要去公立排隊?因為負擔唔起。負擔能力係保險生態入面非常重要嘅一環。」公院爆煲,私院人手未用盡,郭彥麟認為市民買醫保後可以分流,對香港醫療體系有一定幫助。

不過有保險亦並非萬能,原因是理賠程序非常繁複,醫生及保險公司書信來回已經非常磨人,「我親眼見過一個case,病友買咗保險,但幾個月都claim唔到,惟有搵財仔,呢段時間其實加重咗病人好大心理負擔。」

原本於摩根大通任職科技業分析師主管,郭彥麟最終出走創業,成立純網上保險平台OneDegree,希望簡化投保或理賠程序。保險概念原本非常簡單,出事就賠,但他批評現時保險條款複雜,「Terms的確係法律條款,但都可以寫啲唔係淨係畀律師睇嘅文字,我以前做投行時候,十幾年保單係公司畀,離開之後我嘗試投保,連我呢個做咗十幾年ibank嘅都睇唔明!佢依家做法係完全不把用戶當成中心。」

故此,OneDegree核心科技希望理順保險前期以至後勤流程,令投保及理賠可以輕鬆完成,保險回歸根本。OneDegree實際是兩間公司,一間輸出科技助保險公司增強網上銷售,例如助保險公司信諾改善網上銷售醫保流程(見另文),一間正在申請虛擬保險公司牌照,首要主打寵物保險。

擬攻寵物保險市場

郭彥麟回憶母親過身時,多次出入佛堂,親眼見過不少主人幫貓貓狗狗打齋,「其實係make sense㗎喎,佢係屋企一分子,係有生命。」不過寵物保險在香港並不盛行,滲透率只得約2%,與外國約30%至40%有差距,而香港這類保險產品並不多,故此他認為有市場。

不過,保監局現時只批出一張虛擬壽險牌照,但在一般保險上卻未有寸進。被問到OneDegree發牌進展時,郭彥麟提到監管機構對於科技公司較為謹慎,不過他相信保監局有全套想法推進保險科技。

若果未來順利獲發牌照,寵物保險以外,他更希望為新經濟行業提供保險,深信近年這一波保險科技革命浪潮勢不可擋,「我經歷過2002年買股票電子化,當時個阻力係非常之大,第一從業員唔鍾意,第二股票咁多專業知識,但係依家網上買股票已經變成主流喇,紅衫仔呢件事冇喇,保險完全係發生緊呢件事。」

出身芝加哥大學經濟系

郭彥麟是香港仔,中學讀皇仁書院,大學在美國芝加哥大學修讀經濟系,並非精算師出身,不過對保險興致勃勃的他「手癢」自修精算試,而保險與經濟學亦密不可分,「經濟學入面有個utility curve,說明人係唔鍾意風險,所以風險有個價,如果我哋可以集合用戶,定時定候有問題作出賠償,對大家係好事。」

不過他最後還是放棄保險,選擇在投行搏殺近12年,「試過連續兩晚不歸家,有年試過363日上班」,對比投行日夜顛倒的生活,他認為創業壓力更大,除了不斷思考新橋,還有身為老闆的責任,「投行時我條team有廿幾人,公司出糧唔使我理,但依家我唔係諗緊30個員工,係30幾個家庭,呢個係好大分別。」

郭彥麟提到,OneDegree曾經進行過3輪內部融資,30多名員工有近8成人投資,既是僱員亦是公司老闆,現時內部團隊佔股權超過一半,而A輪融資籌得1億元,共有額外1億元追加投資保證,投資者包括科技公司及保險公司。

記者:周家誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載