› 選擇地區
三藩市
紐約
洛杉磯
其他美國地區
香港 台灣 北美
 
2019年03月15日

【屋苑故事.專題】荃灣海濱廣場變國際學校 直擊死場之首鬧鬼謠言

建立時間 (HKT): 0315 00:00

政府斥巨資購「死場」作社福設施,香港死場之首荃灣海濱廣場遂成討論對象。這個面積24萬方呎、近半個旺角朗豪坊的死場丟空約6年,由謠傳鬧鬼到去年短租喪屍館,有人說恐怖,有人來尋幽探秘,但更多人懷念溜冰場、美食廣場等集體回憶。曾風光一時,今天如廢墟。雖然上有政策,但據了解,商場業主仍朝着改建國際學校之路進發。當區區議員鄒秉恬毋忘商場光輝歲月,帶《蘋果》記者記錄它的最後一面。

相關新聞:【屋苑故事.專題】麥玲玲:望墳景有水相隔影響較少

鄒秉恬自1991年起當選海濱區區議員至今,本身亦是屋苑住戶,「海濱廣場當時係新界區幾矚目嘅商場,因為有溜冰場、戲院、餐廳、酒樓、百貨公司(永安),好多人都喺出面入嚟消費。我仲記得8樓美食廣場久唔久請歌星彈琴唱歌,格調都幾高。」最難忘90年代初期舉辦海濱節,廣場噴水池設舞台開幕,有攤位遊戲,一家大細入戲院睇完戲就上去曲奇船長自助餐廳食一餐。其後荃灣區商場開完一個又一個,隔籬飯香的心態,商場每況愈下,「越嚟越少舖,冇得做啦,咁點搞呢?咪轉型,搞咗幾層老人院。」

商場地下及1至8樓,樓面達24萬呎,宏安(1222)在2012年以5.08億元向新世界(017)購入後,曾計劃打造中高檔名店倉。鄒秉恬說:「佢(宏安)就話想搞商場,但又冇新鴻基咁叻喎,邊做邊砌,但停工申請搞3年都搞唔掂,話唔知乜業權搞唔清,終於賣咗畀而家呢個業主(舖王鄧成波)。呢個業主以為好簡單嘅嘢,又係搞咗好耐,咁而家啱啱我哋最近先通過咗畀佢哋做國際學校,希望可以重開,唔使好似一個死城咁!」

相關新聞:【屋苑故事.專題】海濱花園逾二千墳景盤 警察買樓:望墳升官又發財

商場丟空多年,以規模計,是本港死場之首。玻璃大門不設防,由地面沿扶手電梯拾級而上,久未運作的電梯級及齒輪,邊行邊發「咔咔」聲,一步一驚心。一樓設昔日商場租務部,鄒秉恬說,昔日商場租戶離場後轉租屋苑舖位,接着說:「近年商場已成為尋幽探秘勝地,好多人入過嚟啦!」

有關商場的鬼故在網絡流傳,由溜冰場、老人院說到美食廣場,有人說老人院佈局如逃不掉的迷宮,美食廣場有無限輪迴之感。曾是商場最後一名租客的他說:「老實講,我可能氣場大,真係未撞過鬼。」

昔日新界第一個真雪溜冰場,對很多新界人而言都有很多集體回憶,鄒記得:「嗰陣時好多細路仔嚟呢度溜冰,甚至係溜冰學校。」然而現場已成廢墟,告示牌斷裂,假天花支離破碎,場中豎立紅色雪糕桶,高處吊下一條繩,場面正如招待處玻璃窗「SAW」字眼所示,猶如《恐懼鬥室》。冰場面目全非,但早前撞見昔日冰場負責人,原來北上發展順利,現於上海經營4個溜冰場,「有危有機囉!如果唔係佢就繼續幫個咁細嘅溜冰場。」美食廣場令人懷念昔日美食,有人聲稱該處為情侶偷偷摸摸的地方,升降機已停止運作,不少人爬樓梯爬到最高層,鄒笑言:「入來做其他嘢,我就唔知啦,你知啦,有人鍾意尋刺激,越刺激越興奮個啲,我就唔知啦!」

站在商場中庭乾塘多時的噴水池,鄒秉恬欷歔地說:「我哋呢個時代無辦法敵得過商業發展,現實係自己喺度住嘅居民都無辦法支撐一個商場經營,真係一件好可惜嘅事。商場時代終結,歷史就係歷史,永遠要向前走,而家呢個場景可能是大家一齊見證最後一刻,相信唔會再有人入嚟拍攝,係好值得保留嘅影片。將來做咗學校,間隔已經唔同晒,呢個景象只能活在記憶中。」

商場現由鄧成波兒子、陞域集團主席鄧耀昇管理。集團表示,歡迎政府正視社福設施短缺問題,期待政府公佈計劃更多詳情,集團將再作詳細了解及研究。據了解,該集團仍朝着改建為國際學校之路進行前期工作,商場樓層會改建,將會預留部份樓層作非教學用途,不排除提供零售樓層,預計下半年有進一步發展。

記者:陳家雄
攝影:鄒潔珊 張飆


-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載