› 選擇地區
三藩市
紐約
洛杉磯
其他美國地區
香港 台灣 北美
 
2019年03月15日

【屋苑故事.專題】海濱花園逾二千墳景盤 警察買樓:望墳升官又發財

最後更新: 0315 00:05 / 建立時間 (HKT): 0315 00:00

逾30年歷史的荃灣海濱花園受臭海、臭豬及墳景重重包圍,長期低水已反映上述不利因素。所謂「百貨應百客」,單位望墳場,有人生人唔生膽,有人深信先人不搗蛋。地膽經紀講紀律部隊不怕墳景,更深信升官發財。

相關新聞:【美孚半世紀】 直擊第一代單位 木地板歷40年變成咁...

荃灣海濱花園提供1至22座,當中不設13及14座,普遍而言各座A、B、G及H室大部份單位望海,各座C、D、E及F室望墳場,全盤逾5,600伙,意味約半數單位,即約2,000伙望墳。不利因素盡在樓價反映,年初至今成交,8座F室料望墳,今年1月底以500萬元成交,呎價10,081元,12座A室料望海,期內以580萬元成交,呎價11,670元,兩者相差15.8%。

羅郁華是荃灣海濱花園地膽經紀,他指,海濱花園墳景盤普遍較海景盤有15%折讓,屋苑呎價最高的單位通常屬A、B、G及H室,而5座A及B室叫樓王,望汀九橋、藍巴勒海峽。屋苑本身墳海景觀存在差別,對比同區私樓都有距離,目前海濱花園整體均價約1.2萬元,比較同樣偏離港鐵站的荃灣中心均價1.25萬元,低約4%。

相關新聞:【屋苑故事.專題】荃灣海濱廣場變國際學校 直擊死場之首鬧鬼謠言

在屋苑從事經紀15年,見盡客人對墳景盤的睇法,羅說:「記得有個客人來睇樓,開頭就話:『你唔好介紹啲向墳單位畀我,一定唔買!』結果佢最後買咗間全墳景單位。因為夜晚睇啲景觀,遠望維港,見到IFC,佢覺得好舒服喎,向東南,啱啱夏天好涼。所以有時啲客話唔睇全墳景單位,我哋都會照俾佢望一、兩間,咁當然唔好咁應啦!」

羅郁華又記得一名警察,他當初買全墳景單位,之後升職做到警司,將單位轉售予警校剛畢業的警員,「佢同呢個新人講:『放心啦!呢個單位好旺,升官發財㗎,我買咁耐升咁耐。』」不過他直言,本區客對墳景盤接受程度較高,尤其住開望少許墳景的兩房業主,發覺加少少錢就可以換入大單位。

屋苑曾經是炒家天堂,2004年至2008年很多投資者做「化妝樓」,每轉普遍賺15%至20%離場。辣招出台後趕絕炒家,當年有一組投資者偏愛墳景盤,因為呎價低過向海單位,但租金相若,計及回報率,墳景盤較着數。「該名投資者2007年開始入貨,每個墳景單位百零、二百萬,一直買到2013年,跟住收租到而家。而家持有十幾單位,問過佢賣唔賣,但佢唔賣,因為公司名義持有,辣招後買賣成本高。」他估計,時至今日該名投資者每個墳景盤單位保守估計平均每伙市值約500萬元,單月收租逾100萬元,每伙租金回報率逾9厘。

當區區議員鄒秉恬亦是海濱花園業主,「我聽過關於屋苑嘅鬼故唔算好驚嚇,即係見到近墳場有啲光影。我識好多呢度嘅街坊,佢哋嘅祖先都喺呢個墳場,可能互相照應,唔搞自己人啦!就算你好黑仔,衰到貼晒地,都唔會有咩太大問題。我自己本身就未見過,一直都係傳。」他亦指,不少從事紀律部隊工作的人都不介意向墳,「特別係做官嗰啲,覺得向墳好呀!升官發財吖嘛!如果畀佢買,仲專登揀呢啲。」

不過屋苑除了墳景,他指屋苑附近有不受歡迎的設施,包括荃灣屠房,「屠房幾臭,最臭是豬車,曾經請願要求豬隻未落地先清洗,由3次增加到8次。屠房對住海濱花園嘅窗係打開,話要開放式,話啲豬咁樣劏出來會靚啲喎!原汁原味啲喎!叫整屏障又話唔得。退而求其次,向海濱花園的窗戶用玻璃圍封,豬欄那邊就無辦法。屠房臭味而家減輕咗,但地區勢力擁有呢個屠房,相信無可能搬走,但可能海水臭味仲臭過豬。」

荃灣西海傍臭味問題纏繞多年,其實海水已變,「當年橫龍街工業區漂廠、染廠、織廠的污染物源源不絕沖出大海,海面有時轉紅、有時轉黃、有時轉藍,就係染廠染劑直沖出來,海面五顏六色。但都有好處,唔係話臭,只係唔靚,因為化學劑可能已蓋過硫化氫嘅臭味。」工廠北移,水面變靚,但換來臭味,「而家聞到啲臭味係生活污水,係舊區截唔到市民煮完餸、倒落雨水渠嘅水,結果沖到渠口,積聚污染物。潮漲時無味,但潮退時,尤其暑假、熱天,臭味就最勁,好似臭雞蛋味,行過聞到好辛苦。間中有人喺海旁釣魚,有啲自己食,有啲攞出來賣都夠膽死。」不過他稱,政府將裝置旱季截流器,從而令臭氣味在2020年前減少7成。此外環保署及渠務署研發稀釋渠道污水方案,若果成功,臭氣將減少95%。

記者:陳家雄
攝影:鄒潔珊 張飆


-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載