› 選擇地區
三藩市
紐約
洛杉磯
其他美國地區
香港 台灣 北美
 
2019年03月24日

【BrandStory】會考0分地盤工 變出億元護膚王國 彩豐行:我唔會上市!

建立時間 (HKT): 0324 02:00

23年前,楊振源Benny跟媽媽共同創立港產護膚品店彩豐行,以樓上舖起家,主打香港製造,較國際品牌便宜四成,受大眾客歡迎,營業額由首年的數十萬元,爆炸式增長到目前逾1億元。不過近來受藥房及日韓化妝品夾擊,生意已停滯不前長達三年,為了在海量的女性用品市場爭一席位,公司由過去零廣告,變成斥巨資打傳銷戰:「有朋友笑我做Brand building好虛,千萬用嚟買樓收租仲穩陣!」但他認為港產品仍有市場:「香港人都係崇洋,覺得隔離河香,但我覺得香港製造,係可以同外國牌子鬥嘅。」Benny口中所說的產品,便是一支售價僅得30元的沐浴露,這支1,000毫升的土炮產品現時每年賣出逾100萬瓶,成為公司的「殺手梘」,創業過程是一片庶糖產生化學作用的故事。

相關新聞:【BrandStory】荔枝角價租銅鑼灣舖 「親子餐廳」大樹先生:商場談判有藝術

又是會考零分讀書不成,當過地盤工人的Benny學業輸在起跑線,但創業卻有媽媽扶持:「媽咪當年喺洋行供應護膚畀美容院,有一日佢同我講『阿仔,不如一齊創業啦!』,於是就開咗呢間公司。」雖然有母親的美容院客底支持,但初期資金不足,只得十萬元積蓄創業,連貨架都要在垃圾房執二手貨來用,同時供應外國貨予美容院,毛利甚低,於是便想出港產護膚品,這個時候,連父親亦出手幫助:「爸爸有個化學博士朋友,識得整面霜嗰類嘅護膚品,好鍾意研究,但就唔識做生意,於是我同佢夾份開個化學實驗室,溝吓溝吓,就開始自己製造。」

Benny搖身一變,由地盤工人變成化學工人,在實驗室出產護膚品最大難題是配方:「因為呢樣嘢香港冇課程可以讀,想學都冇得學,初期對我嚟講係難題,但之後變成優勢。」由於香港少有生產護膚品的廠家,因此Benny連機器也要自行製作,「淨係整攪拌機個容器,抽真空嘅技術,都好困難。」同時,因為護膚品配方是公司核心秘密,故此生產不能外判假手於人:「當初好傻,每日開機做十幾個鐘,最後想到將每樣材料寫代碼,淨喺叫人跟代碼去溝,咁就唔怕外洩。」到彩豐行位於屯門的工場觀察,現時製作部,每一種產品只需一位職員製作,反而出產部,一條生產線卻需要3至4名員工進行包裝等等,全港員工有數百人,全部產品皆由香港製造,成本甚高,Benny不諱言,當初大陸很多城市邀請他到當地設廠,但最終選擇留在香港:「十幾年前,國內紅地毯歡迎上去設廠,又有稅務優惠,塊地唔使錢喎!」惟他擔心內地人操守及產品質素問題,因此拒絕北上:「當年好多行家湧咗上去,佢哋大陸生產,我就港產,咁我有獨特性,會優勝過佢哋。」他笑言,有部份北上的行家發達,但亦有公司倒閉了。

相關新聞:【BrandStory】翻生全靠一粒燒賣!鴻福堂:貴租逼出嚟

公司營運5年,由批發踩入零售,每次光顧贈送大量試用裝吸客,生意額立即倍增,批發生意首年只得40萬元,零售店首年已增至100萬,而目前每年更逾1億元:「供貨畀美容院,要有數期,但零售係會有穩定現金流,對發展好大幫助。」首間門店設在旺角樓上舖,由於當年日韓及外國品牌售價昂貴,他的產品較一般國際品牌便宜四成,殺出大眾市場這條血路:「當初日韓嘅嘢好貴,又冇廉航,所以我哋銷量好好,但而家啲人去日本機票好平,又會一次過買幾個月嘅護膚品返嚟用,周街藥房都賣化妝品類,呢幾年生意真係冇乜增長。」Benny坦言,近年公司出現危機,除了競爭環境激烈,亦因為自己放軟手腳:「呢幾年係搵到少少錢,有諗過退落嚟,媽咪都話賺多啲錢都係數字嚟啫,所以去多咗旅行,但發覺同事有啲灰心,佢哋會話:『楊生都係半退休架啦,公司唔會點發展啦!』,我發現咁樣唔得,原來會好容易被人淘汰,所以要繼續去衝。」他形容自己的經營方式很節儉,「賺5蚊才使1蚊」,不靠銀行貸款擴充業務,亦不考慮上市:「好多金融界嘅人叫我上市,但計過數,又要使咁多錢維持上市地位,又要玩財技,又要快速增長,會揸乾咗間公司同產品。」

為了生存,他更一改慳錢作風,近月不惜斥巨資宣傳,請來男DJ玩泡泡浴賣廣告,「有人叫我使1,000萬做宣傳,不如用嚟買樓收租仲安穩,又話brand building嘅嘢好虛,唔會有錢返嚟。坦白講,預咗用千萬嚟宣傳,對今年盈利會好大影響,但我覺得香港品牌值得同外國牌子鬥,我目標係沐浴露,可以同Dove呢啲牌子平起平座。」這枝沐浴露,便是由婆婆家中看到的蔗糖水溝出來。同時,他改變多年來的經營方式,首先,以往自家製造的產品只限自己店舖銷售,但現時已供貨予其他網店及零售店,雖然出售利潤會降低,但成本亦會相應減少:「生產線出貨2,000枝同2,500支個成本喺一樣,咁不如我出多啲貨畀其他商家。」另外,他又開始售賣盈利較低的日用品,並棄租旺區舖,將同等價錢的租金轉租3至5間民生區舖:「吸引客人多啲入嚟,一個月嚟多幾次,對賣其他嘢有幫助。」目前全港共有25間分店,今年會進取式加開5間:「我哋嘅對手,好似萬寧咁都有300幾間,以香港人口,我哋有開到40間嘅可能性。」

記者:陳新政

影片:
採訪/ 陳新政 朱得志
編撰/ 朱得志
攝影/ 馮峰 Wyman
剪接、後期/ 郭仕活
編導/ 郭仕活
編審/ 倪敏慧

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載