› 選擇地區
三藩市
紐約
洛杉磯
其他美國地區
香港 台灣 北美
 
2019年04月11日

【港商保命戰】90後拍片吸金百萬!冬OT:撐到生活費就瞓身做

建立時間 (HKT): 0411 06:00

香港年輕人上流難、上車又難,加上社會的政治氣氛令人沮喪,新一代寧願去多次日本,也懶得管他甚麼貿易大戰。年輕人打工重視Work-life balance,甚至收多少人工都不重要,最緊要就是做自己喜歡的事。

相關新聞:【港商保命戰】港商赤柬腹地開廠23年 「要迫擊炮守門口」

YouTuber可算了新一代最嚮往的行業,有自由、有成功感,又有錢收,例如近期竄紅最快的YouTuber「理科太太」,來自台灣的平凡太太,拍攝的影片主要分享科普生活小智慧,由去年6月上傳的第一條影片起計,不到1年,已累積過百萬YouTube訂閱人數,又多次和大明星合作,目前她拍一條廣告叫價至少10萬港元。

由於做YouTuber入場門檻低,一部手機就可拍攝和剪接,香港亦湧現一批年輕YouTuber。Bamboo、Finn和Barry 3名90後,在前年創辦短片平台「冬OT」,推出不少以日常生活為題材的影片,在社交媒體獲逾7萬粉絲。

相關新聞:【港商保命戰】柬埔寨工人唔鬧得 一塊壁佈板汰弱留強

他們說工作不怕苦最怕悶,Bamboo坦言,問題不在於是否要坐辦公室,又或者工時長短,而是能否找到自己人生的路向和熱情,「我覺得個問題唔係朝九晚五,而係做緊嗰樣嘢,係咪你鍾意嘅嘢。」他說只要對工作有熱情,多辛苦都甘心,笑言:「其實我哋依家朝12晚12。」

在創立冬OT的第一年,Bamboo和Finn曾邊全職工作,邊做冬OT,2人儲夠1年生活費後,膽粗粗辭工創業。Bamboo當時的工作是教科書編輯,但發揮空間不大,做事很多框架,謹慎為重,雖然舒適又有私人時間,但他覺得不適合自己,「我跳出嚟做會開心好多。」Finn則表示自己不討厭全職工作,只是人各有所好,「我哋做緊好鍾意做嘅嘢,我生活費又支持到,咁不如認真去全力營運。」

他們口中的認真營運,單單走入公司,未必能一眼看出。他們的辦公室隨意又率性,看上去比較像是家,有遊戲機、酒櫃、咖啡機,連可以整個人睡上去休息的豆袋沙發都有數個,是認真工作還是玩玩吓?看得細心一點,辦公室的裝修巧妙,過千呎的空間以藍色和綠色分割數個場景,令可拍攝的背景變多,連坐墊和窗簾都配合牆壁的顏色。他們工作時工作,遊戲時遊戲,一個30秒不到的場景,團隊足足拍了1.5小時,相機角度、演員表情、收音方向通通一絲不苟,同一個場景重複拍足至少20次。

這一切都得來不易,「其實我哋一路以嚟都唔係好賺到錢。」Barry移開目光,表情凝重,「我哋一開始決定開公司時,資金係得幾萬蚊」,這筆錢僅夠支付公司註冊費、3個月租金和電費,「有電剪到片。」他坦言,有段時期公司發展不算順利,3人要倒貼交租,Finn更曾倒貼3萬元,「啲片好似唔係好受歡迎,嗰陣時的確係難過。」

3人要守業,等到2018年初,觀眾數量上升,吸引不少廣告商,「嗰陣啲廣告多到要幾個月後先有檔期。」當時讓他們渡過難關的廣告商是JobsDB和肯德基,Finn當時沒感覺太開心,「嗰陣時鬆一口氣,啊!終於諗到下個月點交租。」

收入不穩,家人有微言嗎?3人以「奇妙」形容家人反應,「我哋大學畢業嘅時候,都聽到好多人問(父母): 你個仔你個仔第時出嚟做乜嘢?」Finn直言把「正正經經」的工作辭掉後,在拜年或是和親戚見面時,失去一個正式的職銜,「有時反而我哋替家人尷尬,都唔知點樣同啲親戚解釋自己個仔做緊乜,而我媽媽最後同佢哋講,佢唔教書去拍片。」Bamboo對三人都獲家人支持感到幸運,「仲要喺佢唔知你辭職去做乜嘢嘅情況下,都仲唔會畀壓力你,我覺得呢個已經係一個好大支持。」他們透露家人曾想替他們出錢,但被他們婉拒,「我哋仲處理到,唔使畀家用已經係最大支持。」

家人提供心靈支柱,經濟支持則由投資者提供,新媒體830 Media向他們注資7位數字。行政總裁Sunny指,當初是他主動聯絡冬OT,希望他們花錢而不是省錢,「我嗰時同佢哋講,你唔使錢點會賺到錢。」他透露資金主要作擴展,希望冬OT能免於經濟壓力,不用因迎合廣告客而失去自己的風格和質素,「你間公司做得好自然就會賺到錢,夾硬接一啲客,做一啲自己唔鍾意做嘅嘢,成件事會無咁好睇。先做好自己,反而係可以同個客講,我就係呢個風格。」Sunny預計,2年後資金便會差不多用完,「到時候就應該要收支平衡。」

3位創辦人是創辦搞笑平台9GAG的陳展程的中學師弟,這平台全球粉絲逾億,2012年市值已過億美元,同樣靠創意製圖拍片賺錢。中學時期他們就知道這位鼎鼎大名的師兄,Bamboo指師兄創先河,令他們認為創意工業有得做,「喺一個咁接近自己嘅環境入邊,已經有人咁成功,我哋都可以有能力,我哋都可以咁做。」不過,當年曾有中學老師向他們潑冷水,認為3人學不到師兄般厲害,幸好如今略有成就,總算爭一口氣。3人指目前冬0T還在摸索發展方向,「我哋每一日都喺度摸索緊,冇話繼續搞落去,就代表餘生都要將自己定死喺一條路度」,Finn指現時可說是見步行步,「純粹眼下喺呢一個時刻,我哋好享受自己做緊嘅事,而且好似向一個順利嘅方向發展,咁就繼續做落去。」他們期望,冬OT 2年後會有更多觀眾,「希望可以把介紹自己的時間縮短,問人哋有冇聽過冬OT嘅時候,佢哋會話『梗係知啦!』」

記者 劉曉鳴

-----------------------------
追蹤真相 守護公義
免費訂閱支持蘋果 4月10日無阻盡覽
https://hk.adai.ly/PMtkKQIUBV
-----------------------------
動腦Q金像獎周
4月8日-12日 10:30PM
Let’s Q the money!Action!
https://hk.adai.ly/zpCd06PPwV

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載