› 選擇地區
三藩市
紐約
洛杉磯
其他美國地區
香港 台灣 北美
 
2019年05月10日

【BrandStory】孝子辭百萬年薪 返長洲整「平安包」 嚴父反對:太辛苦啦!

建立時間 (HKT): 0510 06:00

香港地租金太高,人情味太少,「老字號」的生存空間日漸縮窄,屹立長洲40多年的餅店「郭錦記」,十年前趁太平清醮出產平安包而為人所認識,短短數日內賣出逾6萬個平安包,惟單靠街坊生意難以繼續生存。今年68歲的老闆郭錦全,雙膝剛動了手術,一直萌生退休念頭,原想過光榮結業,將這個長洲老字號塵封下去,儘管長子郭宇鈿Martin想繼承衣缽,但遭父親反對。幾經掙扎,兩年多前Martin先斬後奏,辭去金融主管職位放棄百萬年薪,由中環返回長洲,由辦公室踩入餅店,脫下西裝,Martin娓娓道來這兩年如何面對老店褪色、師傅質疑以及老父不認同等挑戰。

相關新聞:【BrandStory】荔枝角價租銅鑼灣舖 「親子餐廳」大樹先生:商場談判有藝術

「我係Martin,今年37歲,畢業後做金融行業十幾年,10年前爸爸已經話想退休,我一直同佢商討,想返嚟接手間舖頭,但佢都唔同意,唔想我入行,因為爸爸覺得做金融收入唔錯,做包整餅收入低又辛苦。但我覺得『郭錦記』就好似未打磨嘅鑽石,爸爸佢喺礦山開探出來,但佢老啦,我有責任、情意結,將粒石打磨,將舖頭做落去。雖然爸爸咁多年都反對,但我兩年半前,喺公司望住個海,覺得等吓又一年,等吓又兩年,心諗係時候要跳出comfort zone,於是私底下辭職,返到長洲同爸爸講,我返嚟幫手啦!

「雖然過去每年嘅太平清醮,我都有請假返舖頭幫手,但現在全職做好唔同,發現做街坊生意,根本回唔到本,主要做定單,一年四季做時節嘢,去年太平清醮就賣咗6萬個平安包,不過我哋冇加價,仲係賣9元,但背後嘅成本加咗百分之十以上。我有個計劃,想將郭錦記衝出長洲,成為手信禮品,所以我同好多商家合作,去年就有Hello Kitty平安包,今年就有蜘蛛俠,仲喺百貨公司做Pop-up store,件事都好鼓舞,因為證明老店仲可以同大公司並肩,老餅都可以加新潮嘢。」

相關新聞:【BrandStory】翻生全靠一粒燒賣!鴻福堂:貴租逼出嚟

「不過經營餅店簡直係裏外受敵,首先班老師傅初期唔認同我,因為平安包已經有3隻餡料,我整Hello Kitty又加多4種料,工場做到踢晒腳,我要解釋畀佢哋知,咁樣做有咩好處,結果出到嚟幾好,佢哋認同我,其次係點樣對外推廣。其實我爸爸係好嚴格,返到嚟咁耐,都冇話過認唔認同我嘅表現。」

Martin努力將新元素帶入老店,盡力證明自己,父親由拒絕再到認同,對兒子的一切評價放在心底裏,雖然重要的話沒說出口,但老懷安慰之情,不言而喻,笑容盡映在臉上。

「我係郭錦全,今年68歲,郭錦記就係我個名改出嚟,一做就做咗40幾年,最初做花生糖,之後整平安包,養大咗間舖頭同屋企人。長洲有4間老字號因為冇下一代接手,關晒門啦,我幾年前開始諗退休,諗住喺太平清醮嗰3日,每日免費派5,000個平安包畀街坊,同大家講我光榮結業,點知個仔話返嚟幫手。其實我係反對嘅,因為太辛苦啦,佢做金融份工收入仲高過而家啦,星期六、日仲可以有家庭樂,而家日日都喺舖頭做嘢,幾辛苦呀!」

「難聽啲講,佢唔做我仲開心,因為我唔使跟頭跟尾,平時有活動,我都同太太落去幫手。佢經驗又唔夠,同埋最困難是請員工做餅,因為冇人肯入行做,不過自從阿仔返嚟,我哋溝通都多咗,佢除咗經驗不足,同啲大公司合作嘅方法都幾好。我喺潮洲人,好少讚啲仔女,但我見阿仔而家都做得幾OK嘅,希望佢可以將郭錦記發揚光大啦。」

放棄高薪厚職,Martin已做足準備:「過咁多年已儲落資金,太太都有份工作,足夠養大仔女,雖然而家賺唔到咩錢,但起碼唔使擔心開飯先。」除了將餅店衝出長洲,Martin最想能得到父親認同,將老字號傳承下去,若要為這兩年多表現打個分數,他笑言:「好難講自己有幾多分,但可以講嘅係,舖頭多咗人認識。如果你問我值唔值得做落去,以金錢衡量係完全唔值,但有朝一日做大咗,做到手信,到時我會同番你講,值!」

記者:陳新政

影片:
採訪 / 陳新政、朱得志
編撰 / 朱得志
攝影 / 源、耀
剪接、後期 / 許碩允
編導 / 許碩允
編審 / 倪敏慧

investMAN
For People of Style & Substance
掌握理財智慧 感受生活品味
http://facebook.com/investMAN.hk
---------------------------
【六四30】守住歷史 拒絕遺忘
https://hk.adai.ly/zdzKtt2RiW
---------------------------
星期一至五晚上10點半
《動腦Q》Let's Q the money!
http://bit.ly/2QW8LcIr

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載