蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年05月19日
馬上成為壹會員

【富二代】中原太子女搞基金買學生公寓 「唔覺得樓市會大跌」

建立時間 (HKT): 0519 18:00

香港地不少人恨上車,擔心遲買仲貴,但偏偏經營地產代理王國的中原集團主席兼總裁施永青、其二代接班人施慧勤(Janet)就絲毫不心急,至今仍未置業。她更嘆起慢板,在英國知名學府劍橋大學畢業後,回港在國際外資行從事投資工作,儲起一定「打工」經驗,近年先正式為父親打理江山,入主中原旗下姊姊公司利嘉閣地產任主席,近期更替中原地產走出亞洲,成立私募基金,進軍美國投資學生公寓。

80後的施慧勤(Janet)身為城中典型的富二代,父親是地產代理龍頭之一的施永青。中原集團主席兼總裁施永青平時愛論時政經濟,然而膝下兒女作風卻非常低調。在英國名牌大學畢業的她,未靠父幹上車,反而每月交租俾爸爸,租住父親在愉景灣的物業,直言「唔覺得樓市會點差,雖然貿易戰好似惡化左啲,香港個樓市你都睇上次以為好差,但都唔係跌左好多,所以今次唔會覺得話大跌,講真唔係大跌嘅話,你依家入同遲少少入都唔係太大分別,所以睇到真係岩嘅(單位)都會入(買)嘅」,暫時未有太明確的心水物業,重心先放在家庭和事業上。

父女兵上陣進軍海外市場

多年經營下來,中原集團業務不止地產代理,Janet幫父親打理江山,就主要負責地產以外業務,如投資、財務和金融等,擔任利嘉閣及中原集團子公司的主席,而弟弟施俊嶸(Alex)就出任中原集團副主席,主力負責地產業務。分工明確後,她年初已負責獨家經銷由鵬格斯設立的C基金,新近就帶領中原集團衝出香港,大搞海外房地產的私募基金,與爸爸拍住上任投資委員會(Investment Committee)成員給予指引。

今次父女兵上陣,原來不是即興之舉。施永青透露,該基金已籌備近3年時間,資金規模不設上限,主要為找好項目而投,首個投資項目為美國學生公寓,現已斥資約1,400萬至1,500萬美元購入喬治亞州(Georgia)學生公寓,項目共32個單位,即128間套房可供出租,目前入住率為100%,2019/20學年提前出租為85%,租金按年升7%,每房間月租收入介乎600至800美元(約4,680至6,240港元)。

Janet就補充道,揀選公寓時先著重附近的學校,從而引伸到其學生供應、地理位置、公寓基礎設施、公寓管理等條件,收購後亦不是大安旨意,「買完之後唔係等升值,而係可以做一啲Value Add(增值),令到將來賣出嘅時候有個增值」。但無選擇美國的國際知名學府,而是地方的公立大學,她就話:「搵到適合嘅都會揀嘅,睇到嘅又適合都係美國本身嘅公立大學」,日後有機會都會投資名校附近的學生公寓,主力挑選中高端學生公寓投資。

買樓要先遭業主「審問」

太子女亦做足功課,在今年5月到訪美國學生公寓實地考察。曾在英國留學的她比較起兩地學生住宿,就大嘆:「比我以前英國住嘅宿舍靚好多、豪華好多」,「一層有7至10多人,每人一間房仔,可能有個升盤,其他Toilet(廁所)、浴室同廚房一層都係Share(共用)」,而美國方面就是好大,「一間屋2至4個人一齊Share,有個好大嘅Open Kitchen(開放式廚房),有個好大嘅Living Area(生活區域),每人一間房有獨立廁,甚至係衣帽間咁樣」,更有設游泳池和健身室等設施,具備大學氛圍,相信是學生的夢想宿舍。

首次進軍美國樓市,她更發現買樓不是一買一賣就得,因是次購入喬治亞州學生公寓要先予賣方面試一輪,向旗下團隊問具體發展問題,她笑言:「通常買家做Due diligence(盡職調查),買家去睇個物業點啊,買家有無唔見得光嘅野,買左會唔會有咩手尾,通常係咁架嘛,但依家我地買都要比人審咁樣」。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載