蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年05月20日
馬上成為壹會員

【大棋局】美國露牌 中國鋤價(Mr.Tregunter)

(資料圖片)
最後更新: 0520 16:53 / 建立時間 (HKT): 0520 16:50

貿易戰進入最精彩階段,關鍵轉折位,係特朗普最後一刻計錯數。當中國在談判埋尾之際要求修改協議,特朗普厲言冇可能並加中國關稅,但旋即又放風可以再傾一個月。就係呢一下,被中國摸到底牌,貿易戰原來有價講。

相關新聞:【CanBank】貶值風險不容忽視(散子)

問題出在,貿易戰開波之初,中方完全不確定美方意圖。由關稅、中興事件到美國副總統彭斯發表演說,都在營造美國要開中國拖,步步進逼。於是中國由亮劍、勿謂言之不預到低調處理,辟君三舍。結果中國最後一下偷雞,摸到有價講,那美方前面所鋪排的一切,就變成虛張聲勢。因此可以看到,中方立即轉變態度,輿論鋪天蓋地反擊。中國並非要談判破裂,而係要鋤最後一口價。

此所以為何貿易戰之初,估計大機會如小牧‧長久手之戰發展,蓋形勢太過相似。豐臣秀吉一方勢力比德川家康強太多,乃致豐臣秀吉以為食硬。德川家康的應對方法,係不正面接戰,一直拖延,然後在拖延期間猛搵對方漏洞,不斷奇襲。結局係豐臣秀吉要啃,啃德川唔落;要退,又不能退,最後只能放下身段和談收場。

相關新聞:【亮說亮話】政府不應檢控新地(湯文亮)

此次中美貿易戰最巧妙的地方,係特朗普視為一場談判,運用其引以自豪的談判技巧去同對家砌;而中國,由於關係到國家發展前途,視同打仗,用嘅係戰略。於是出現當下情勢,特朗普以為食硬,談判即將終結,點知臨門一腳反抽。然而美國總體上強勢,主導全球各種規則秩序,中國當下要反檯不太可能。縱使中美雙方擺出各種姿態貌似就快要斷交咁款,但從客觀情勢上看,現時反檯冇著數。真係要反制,就會係等美國經濟出現衰退時。

特朗普有太多戰線要開,下一屆總統選舉,加息周期完結,美國晉身原油淨出口國,此三者時間軸的銜接點,都在2020年前後。所以貿易戰係一個金剛圈,貿易條款係一道緊箍咒,用嚟笠住中國限制其活動,以便準備中東石油戰略。貿易戰拖得越久,美國要開新戰線的空間就被壓縮。俄羅斯對此十分明白,當被問到點睇中美貿易戰,俄羅斯話關我鬼事。

特朗普上任後學列根,吹到要搞太空軍事;習近平亦模仿毛澤東,間唔中擺政治姿態。但現在不是1983年,更不是1950年。呂布佔據下邳後,曾予書莒城蕭建講過一句話:布雖非樂毅,君亦非田單。中美要掰面,時辰未到。

Mr.Tregunter
---------------------------
【六四30】守住歷史 拒絕遺忘
https://hk.adai.ly/zdzKtt2RiW

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載