› 選擇地區
三藩市
紐約
洛杉磯
其他美國地區
香港 台灣 北美
 
2019年06月15日

【全球樓行】擲千萬柬埔寨開4間日本城 港妻:自豪養活30戶

建立時間 (HKT): 0615 06:00

做生意免不了跌跌碰碰,跑到窮國開檔,難度更幾何級數上升。有對港人夫婦旅途上被柬埔寨菜迷倒,落戶金邊開檔賣家品,投資千萬積蓄開四間家品店,開業五年大部份時間蝕住做。同一筆錢在港買層樓,蹺個二郎腿收租,生活悠然無煩惱。人妻曾問自己算不算做了件蠢事,掙扎過後,還是咬緊牙關捱到收支平衡,相信經歷無價,「養起30個柬埔寨家庭,我覺得自豪」。

相關新聞:【全球樓行】日本820萬間「空宅」無人住 料四年後增至千萬間

離開香港理由千百樣,如心碎、恐懼,更甚者被一碗麵引誘。2012年謝家豪 (Calvin)及任慧姸(Alice)到柬埔寨旅行,落機吃了頓高棉麵食,「咦,啲柬埔寨菜幾好食喎,不如搬過嚟住啦咁」,二人在餐廳就開始上網搜索居住情報,即場考慮移居。

事緣他倆老早想在東南亞找個新興國家嘗試發展,「做生意好講時機,如果有國家好似香港七、八十年代咁,捉到發展嗰一下,咁我哋可以一齊起飛。」口腹之慾 成契機,除此以外還有比較:印度與尼泊爾文化衝擊太大、緬甸老撾彷佛被毒梟盤踞。左扣右減,短短半年後,他們就成了金邊居民。

相關新聞:【全球樓行】直擊無印良品千呎「窗之家」 建屋連裝修129萬

那時金邊已有現代化商場出售生活雜貨,但貨品質素、款式未盡如人意,於是兩人聯絡本港連鎖家品店日本城取得特許經營權,主攻中產市場。五年內金邊連開4舖,但高速擴張不代表賺到笑,反算是為勢所迫。Alice透露向廠商購貨時或需訂一整個貨櫃的數量,店面要夠多才可快速去貨,所以首四年是蝕住擴張,近期才收支平衡。

「其實都有諗過結業。」Alice回憶2016年開到第三間分店時尤其辛苦,於是訂下半年限期,屆時生意要是沒好轉那就索性放棄,「呢個國家慣咗有慈善資助,所以好多人對公司一定要賺錢嚟維持係冇概念」,費盡心力讓員工明白盈利多寡的重要性,到半年後營業額飆升,生意才得以維持。

「我自己有時都覺得好似好笨咁。學你話齋,香港買層樓都收到租,咁點解咁辛苦喺呢度又捱咗5年先收支平衡呢?1,000萬(投資)可能10年先至搵返嚟,其實我蝕咗10年時間,但諗返可能呢10年時間得到嘅可能係經歷……同埋員工有30人,佢哋有佢哋嘅家庭,養到30個柬埔寨家庭,我覺得自豪!」

經歷裏還有留人難,員工喜歡新事物,數個月就心思思轉工;公眾假期多達28天,紅日之多屬世界前列,重要假期無人願上班;治安不及香港,有分店曾被爆竊數次。不過,兩公婆覺得當地人普遍純品、誠實,員工就算打破價值1美元的商品也會如實上報,害群之馬屬少數,亦有感當地人收入上升勝預期,希望未來生意可以繼續擴張,養到更多家庭。

有意在高棉長遠發展,兩人租住數月服務式住宅後就火速置業,「我哋係啲冇諗得咁遠嘅人嚟,覺得價錢OK就買」,以約20萬美元(約156萬港元)購入一間建築面積2,600呎的4房單位,實用率約5成,丈夫有私人寬闊的玩樂房,擺放跑步機、琴及音響等。

在發展中國家揀樓,Alice指樓層、景觀都是次要考慮,但樓盤自設發電機就必不可少。受雨水不足致產電及耗電量增加等影響,今年金邊不少時間要各區輪流停電,30多度高溫下想嘆冷氣就要靠屋苑發電機。

記者︰陳東陽﹑吳美茸
攝影︰王心義
剪接︰吳卓鋒

-----------------------------
【新聞有價】繼續撐蘋果
請往蘋果日報網站了解更多

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載