› 選擇地區
三藩市
紐約
洛杉磯
其他美國地區
香港 台灣 北美
 
2019年06月27日

【我的置業故事】葡萄同學買樓年賺百萬 90後王小姐:產後抑鬱去買樓

建立時間 (HKT): 0627 06:05

「遲買會貴」在樓市只升不跌的年代已植根港人腦海,90後經營美容店的王小姐夠錢買樓卻遲遲未出手,2年多前聽聞同學買樓賺逾百萬元,「就喺呢一年幾,我陀BB呢段期間,佢層樓賺咗百幾萬……」自覺錯失入市良機,產後才1個多月,碰巧啟德有新盤開售,最終斥資740萬元買入一個兩房單位。被問有無買樓自住的逼切?她坦言無,只是「執輸行頭」的心態,無懼升跌,「就算真係負資產,咁我都可以再賺返來,係嘛!」

相關新聞:【我的置業故事】二千萬樓畀一半首期 80後陳太:投資賺番嚟,冇得教!

王小姐2017年以約740萬元買入啟德天寰一個實用438方呎的兩房單位,呎價約1.7萬元,「呢層樓係我產後抑鬱時買。生完BB,唔可以返工,日日喺屋企,好唔開心。其實陀BB前都睇緊樓,後尾陀咗,就算啦,唔好搞咁多嘢。」產後與已做業主的中學同學閒聊,「我問佢:『你層樓點?』佢話而家買咗一年幾,就喺呢一年幾,我陀BB呢段期間,佢就已經賺咗百幾萬……咁我就覺得,點解我又錯失咗呢個機會呢!呢個就係點解我要嗱嗱臨去買樓。」

買樓受朋輩影響?「一定係。你見你身邊啲人買咗,佢買,你都可以買得起嗰陣時,你就錯失咗呢個機會。」她承認沒有買樓自住的逼切性,現與丈夫居於老爺奶奶中西區大單位,她覺得:「樓市越來越高,你而家唔買,將來可能都好難買得起!」

相關新聞:【我的置業故事】沽深圳樓賺兩球返港買樓 港人:大灣區非遍地黃金

坐月一個多月後,碰巧見過兩次面的經紀致電推銷啟德天寰,「當時我唔想出門,坐月嘅女人,唔想郁,但人哋(經紀)揸架車嚟到我屋企門口,我係最後1分鐘先遞表。當時屋企人唔知,但佢哋知道我想買樓,老爺奶奶好支持,覺得我有呢個諗法好啱。但我老公就唔想買樓,覺得點解要畀壓力自己呢!但我哋後生呀嘛,我哋輸得起。就算之後點樣,你都可以賺返嚟,啱唔啱?」她續稱:「要跳出你嘅舒適圈,唔可以話有得住,你就去住。趁自己後生,可以輸!我要有我自己嘅嘢,所以就覺得應該要買樓。」

王小姐覺得,買樓買地區,「呢個區發展覺得幾好,我就將佢同西九龍做對比。我係見證西九龍發展,當時讀緊中學,見佢起緊柯士甸、豪宅,我就覺得呢度將來會同西九龍一樣。而且呎價算平,都未過2萬。所以我就覺得要買囉!」其實早於中學時期已有買樓慾望,「覺得應該要買屬於自己嘅樓,所以已經儲錢。」

今次買樓首期是多年理財所得,「中七後開始買股票,賺咗少少,但唔多。我好彩,唔建議大家去買呢樣嘢。其實嗰時無做任何功課,只不過睇嗰日有啲咩,就買咗隻紡織股,都賺得幾多吓,買咗幾萬股,2個幾買,十幾蚊放。自己都覺得好傳奇,都唔知點解可以買到。記得當時考完高考等放榜,就開始玩股票。唔係無聊,就覺得開始玩呢啲嘢。就搵到呢一隻,唔知點解搵到。係符碌嚟,後尾升得好快,有時一日已經升1蚊,中間有時放一半,最後十幾蚊放晒。(人生第一桶金?)算係。」早發橫財,卻已感悟財來財去,「基本上拍拖後,買股票就無賺錢,就輸錢,但唔影響生活。屋企有人做金融,已多次勸千祈唔好買股票,唔係而家,係不嬲都唔好掂。以前賺錢係好彩!」

不信買股可致富,惟有營商來生財。「我爸爸做生意養家,媽咪開餐廳,佢哋兩個都做生意,我覺得我都要做。細個已經覺得,唔理你做咩生意,大又好,細又好,就算小本生意都可以做。」22歲涉足美容業後,24歲將多年積蓄,加上親友資助開設自己美容店,小本經營,穩打穩扎以街坊生意為目標客群,經營多年至今,賺夠買樓的首期。訪問中三番四次說「後生輸得起」,但香港曾經出現負資產?她答:「我哋叫初生牛犢不怕虎,我未經歷過(負資產),唔知佢有幾可怕。但講真,就算真係負資產,咁我都可以再賺返嚟,係嘛!」

資深驗樓師賴達明驗收她的單位,指單位出現問題比較多,尤其是門、磚及櫃。全屋門框的收口「做啲唔做啲」,大門、房間、浴室門內外的門頂,及靠牆的門框套有大隙未做收口或封邊膠爆裂,其中主人房的門框罅闊到可以攝入五元硬幣。部份窿罅多又大,馬桶供水閘掣後供水喉與牆身有大孔隙,過牆喉周邊未做封口。

單位多處出現空心磚,包括露台天花2塊、門底1塊、工作平台門底1塊。浴室馬桶對上鏡櫃一塊玻璃鬆脫,搖搖欲墜極危險。明哥評分單位得分63分,他表示,驗收天寰6個單位,普遍得分60多分,整體交樓質素比較差,較常出現問題是門及磚,其中一個單位的廚房防火門字有裝門鉸,多個單位都有很多修口的窿罅未補,建議業主注意這幾方面。

負責天寰的誠穎投資發言人表示,就上述單位發展商在收到相關驗樓報告後已第一時間聯絡承建商跟進執漏事宜,已完成執修,並將盡快聯絡業主驗收。

記者:陳家雄
攝影:wyman

-----------------------------
7月4日起 《蘋果動新聞》只限升級壹會員閱覽
繼續撐蘋果!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載