› 選擇地區
三藩市
紐約
洛杉磯
其他美國地區
香港 台灣 北美
 
2019年07月09日

【創業起義】不要讓香港壽終正寢(尹思哲)

最後更新: 0709 16:00 / 建立時間 (HKT): 0709 15:08

壽終正寢,係形容老人家喺屋企安然死亡,意思係善終,用嚟形容修例風波,中文絕對係唔合格。反而,香港呢個老人家,自從1841年開埠,到今天178歲高齡,唔通真係要壽終正寢?

相關新聞:【創業起義】要跟,我揀跟實李嘉誠(尹思哲)

香港嘅開埠,好大程度上,係當年嘅英國人,為咗爭取貿易自由,想打開清帝國龐大市場,因而作出嘅決定。概念上,香港開埠同創業十分相似,例如都係挑戰傳統霸權、背後有實力雄厚嘅投資者,明刀明槍爭地盤等等。

其後,香港不斷發展蛻變,至今最引以自豪嘅,係舉世無雙嘅自由,包括:貿易經商自由、言論出版自由、人身安全自由、宗教信仰自由。但今天,以上好多自由係不進反退。喺商業世界,創辦人自由不進反退,唔能夠隨心所欲做事,例子亦多不勝數,大部分關投資者事。例如公司財政大權,創辦人竟不能作主。以草創期為例,公司未賺錢,投資者驚創辦人出糧太多,有時佢哋亦鍾意派嗰CFO入嚟,睇住啲錢,亦會制訂各種規矩,常見係人工同業績掛勾。但你可能會話,咁係無可厚非。

相關新聞:【創業起義】借鑑英「佔領香港」 創業要成功:盡做!(尹思哲)

但當公司上咗軌道,有錢賺之後,點解依然唔俾「還富於創辦人」,包括唔俾創辦人派息,唔想佢哋加太高人工?既然公司證明係work,賺到錢,又辛苦咗成年,創辦人想派股息,享受創業嘅成果,犒賞吓自己,仲唔介意派埋投資者,何樂而不為?原因唔係鬥氣,而係投資者同創辦人目標,根本就截然不同。對創辦人而言,檔生意係佢唯一,時間奉獻晒,梗係想有錢take home,唔係點對屋企人交待?但投資者只想檔生意爆大,有下一輪好,或者M&A離場,佢至可以賺到盤滿缽滿。啲錢梗係留返擴充,點可能派俾創辦人?況且,投資者大把錢,回報要以X倍計,唔係嗰少少股息。最慘嘅係,創辦人本身嘅目標,若然只係公司可持續發展,個人達至財務自由,同埋有得拎錢返屋企、享受天倫之樂嘅自由,當初籌錢可謂一個最錯誤決定。

籌錢引入投資者,理論上係一條單程路,行咗第一步,就好難行得返轉頭。但可以做到「撤回」投資、買返股份嘅創辦人,亦唔係無,社交營銷工具Buffer係其中一個。

但世事有好多嘢,原來唔係大家想話撤回,就可以撤回。香港人而家點解咁慘,大家明未?

尹思哲
http://linkedin.com/in/wanszezit

investMAN
For People of Style & Substance
掌握理財智慧 感受生活品味
http://facebook.com/investMAN.hk

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載