› 選擇地區
三藩市
紐約
洛杉磯
其他美國地區
香港 台灣 北美
 
2019年08月10日

【亂世中環人】滙豐兩高層離職真相(華爾街狠人)

最後更新: 0810 23:11 / 建立時間 (HKT): 0810 16:08

今次想爆吓狠人喺銀行裡面的第一手消息。

首先,最近兩位滙豐最高層相繼離職,我夠膽講100%係政治原因,完全唔關咩工作能力事。(有媒體話係因為重大投資失誤....搞笑咩....)

係人都知,真正的公司話事人,唔係CEO,而係董事會,而董事會要炒CEO或高層,真正的原因絕對唔係表面的原因。

咁點解今次滙豐要炒人?仲要喺呢個咁敏感嘅時候炒?

簡單講,係同中共有直接關係,但唔關咩4000億事。

中共過去十幾年,極為進取地追求經濟增長,中間當然有數之不盡咁多的利益輸送,銀行業係直接受惠。中共與香港各大銀行之董事會高層的關係可以話係千絲萬縷。你根本想像唔到中共手上有幾多銀行業董事會成員的黑材料。

而今次中共逼滙豐董事會炒人,一來係要追究之前滙豐有份幫美國司法部搞咗一份可用來起訴華為公司的材料,最終間接導致華為的孟晚舟在加拿大被捕。

二來中共今次係要清晰地俾所有銀行業董事會及高層知道:你企喺中央嗰邊,定係同錢作對嗰邊?(所以呢兩日幾間銀行相繼登報紙向中央表明效忠,內容極之嘔心。但無計,銀行唔會同錢作對。)

狠人多年銀行經驗,都跟過好多內地的大客,中間有啲私底下都成為咗好朋友。仲記得早年有一次同一位內地上市公司的一位股東食飯傾偈,佢計劃緊全家移民,打算放啲股份套現,佢話:「當我有這個打算時,賣了少量公司股份,馬上就收到中央官員電話,要求我一天之內買回股份,否則後果自負。並且警告我,如果不想坐牢,就不要繼續申請移民。」

佢呢番說話,我好深刻,一直記住咗,每次再見啲內地企業嘅老闆客,我都會有種可憐佢哋嘅感覺。冇錯,佢地名義上有好多資產,但係喺中共政權嚴密監控之下,佢哋唔係真係過得咁開心咁自在。所以幾乎全部我認識嘅內地有錢人/官員,可以的話,佢哋嘅屋企人全部都會移民離開中國,佢哋都唔想自己嘅下一代活喺呢個提心吊膽嘅國度。

依家香港愈來愈似大陸,中共選擇咗更嚴厲打壓香港人各方面的自由,今次選擇先打壓航空業及銀行業,企圖令大家唔敢再發聲,亦試圖孤立同分化還在抗爭嘅香港人。

依家每次政府記者會都大打經濟牌,又話示威者搞亂香港,影響香港經濟,其實真正始作俑者係背後的政權。(之前金融業同路人發出的聲明都已經討論過)大格局咁睇,中央已經全面反攻,政府拉攏商界表態轉移經濟差焦點,嘗試重新喚醒香港人追求安穩賺錢嘅基因。(好多香港人卻唔會知道賺快錢嘅代價係用香港下一代人嘅前途黎換的。)

我希望各位同路人都更警醒,呢刻我地一定要團結,唔可以再中計,我哋依家首要做嘅,係要回歸法治、自由同民主,因為呢三樣嘢先係安穩經濟嘅基石,亦係香港一直以來成功對抗多次經濟挑戰嘅最大優勢。

最後強調多次,金融業同路人和廣大市民齊心推動香港全面發展,五大訴求缺一不可!香港人,加油!

華爾街狠人
https://www.facebook.com/FinanceFellow/

(利申:狠人唔會自爆身分,一來我仲想繼續搵食養家,二來我希望繼續透過狠人呢個身份話俾大家知香港金融業的真相。所以我只能講一些唔會有機會俾人知道我真正身份的資料。一句講晒:信就信,唔信就算。)

investMAN
For People of Style & Substance
掌握理財智慧 感受生活品味
http://facebook.com/investMAN.hk

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載