› 選擇地區
三藩市
紐約
洛杉磯
其他美國地區
香港 台灣 北美
 
2019年08月20日

【BrandStory】單賣老婆餅年收逾億 奇華三代嘗推西餅:客人接受唔到

建立時間 (HKT): 0820 06:00

「記得當年二次大戰,爺爺當年喺雜貨舖拎塊床板,將麵粉、糖同奶粉搓做麵團,用個石油桶做焗爐,對住個碼頭賣餅。」踏入80周年的奇華,一向是香港傳統唐餅的本地薑,執行董事兼總經理黃嘉傑(Max)肩負家族傳承重任,面對現時西、日式餅夾擊,要殺出重圍不易:「其實我哋整過生日蛋糕,都幾好味,但客人認為我哋係賣月餅同老婆餅嘅傳統嘢,接受唔到新嘢。」曾試過走西餅路線,但吃力不討好,專注做唐餅反而有驚喜:「將老婆餅做手信,喺機場賣得特別好,係過千萬塊去計!」即單是一款老婆餅,生意額已逾億元。

相關新聞:【BrandStory】荔枝角價租銅鑼灣舖 「親子餐廳」大樹先生:商場談判有藝術

Max於97年畢業後加入奇華,回到家族企業工作,壓力自然更大,「以家族生意嚟講,只可以成功不可以失敗,我覺得而家爸爸一定未滿意,因為佢係要求高嘅人。」兒時曾經在店內學整餅,但記憶已模糊,但在訪問中,他多次強調按部就班是祖父教授他的要訣:「爺爺同我講,短仔上樓梯,即係做咩都按部就班,以前啲掌櫃,用毛筆去記賬入數,我初初叫同事改用原子筆,佢哋會同我講有冇搞錯?」另一種改變,是將以往的舊區街舖轉往旺區及商場,「以前喺屋邨地方開舖,但隨住時代改變,要做到生意,就一定要搬舖。」一般麵包餅店,會在舖內設有工廠,每日即造麵包,奇華以往亦是靠這種方式起家,但現時已改為中央工場出貨,「我都想新鮮出爐,但當面對咁貴嘅租金,就要忍痛去選擇。」

現時奇華於大埔設有廠房,訪問當日走入其中一層生產線,雖然全面使用機械自動化,但單計一條月餅生產線,因為有多個工序,仍然要6至7個員工負責進行,包括包蓮蓉、切餅、檢驗等等。Max認為要保持品質,生產仍未能完全靠機械:「用手做嘅餅一定係好味啲,所以要拎個平衡點。」他補充指,除了機械能節省人手成本,改變包裝亦更提高效益:「以前啲餅只可以放一兩日,但換咗個包裝,可以放一星期。」

相關新聞:【BrandStory】翻生全靠一粒燒賣!鴻福堂:貴租逼出嚟

麵包餅類是兵家必爭之地,除了傳統餅店,咖啡店及便利店都銷售麵包,加上各種日、西式大品牌競爭,奇華要殺出重圍,甚至要跳出老餅框框並非易事,Max坦言,公司過去曾想將中西合璧,但難以洗脫外界對奇華是唐餅代言的「偏見」,「其實係有做西餅、蛋糕嘅,講緊10年前已經做,但啲客人就係唔買,佢哋覺得奇華唔係做呢種嘢,佢哋將公司定位係月餅或者嫁女餅。」Max沒有「認命」,試過走不同的路,例如最近開了冰室以及烘焙工作室,「冰室嘅菜式食(得多)到我哋嘔先滿意,工作室係想吸引多啲年青人及上班族去整同食唐餅。」又想出將懷舊小食包裝成香港手信,不過銷售數字說明一切,月餅及老婆餅兩款傳統貨,仍然高踞排行榜首兩位,當中老婆餅更出售逾1,000萬塊,以一盒8件裝售價88元的老婆餅計算,單計這款唐餅的收入已逾億元,Max笑指:「個市場有辣有唔辣,好難去食晒,當好專注一個位時,客人係會有信心,所以都係決定做中式餅嘅專家。」同時,公司會以代工方式,替咖啡店等做餅,以批發生意代替正面競爭。

現時奇華全球分店逾百間,有足夠條件上市,惟Max卻信誓旦旦地表示拒絕:「我哋諗嘢比較奇怪,出發點好多時唔係生意額,係想個品牌行先,如果上市就會有壓力,要交數畀股東。而家廠房都不斷擴展緊,但我唔希望個生意額會突然五成、一倍咁增長,雖然係賺到錢,但怕整出嚟嘅嘢唔好食,一唔好食,客人就會嫌棄你......」

記者:陳新政

採訪/ 陳新政 朱得志
編撰/ 陳新政
攝影/ Wyman 冬菇
剪接、後期/ 許碩允
編導/ 許碩允
編審/ 倪敏慧

investMAN
For People of Style & Substance
掌握理財智慧 感受生活品味
http://facebook.com/investMAN.hk

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載