曾幾何時，Reits是穩健之選，在近年磚頭長期看漲的情況下，有升有息，無論是月供定長揸，皆贏到開巷，但過去一周抗爭越演越烈，商場現在寧願關門做少幾日生意，都避免衝突在自己個場發生，林鄭星期二叫業主及地產商同舟共濟、共渡時艱，言下之意就係想你哋減吓租，支援商戶。
青冰即時睇吓幾隻Reits的表現，冠君（2778）及富豪產業（1881）已率先穿底，創52周新低，誠哥旗下的泓富（808）及置富（778）亦貼住底位，最硬淨是四叔的陽光房產（435），仲有6%先破底，雖然5隻Reits有啲做商廈，有啲做商場，但整個sector同時咁弱，證明市場資金已經唔理你做邊瓣，先沽為敬，若戰友覺得二線唔夠代表性，就睇吓一線的希慎（014）、太古地產（1972）及九倉置業（1997），就知道今次真係大大鑊，暫時仍相對高位的領展（823），或許只是時辰未到而已。
除了領展，其他Reits的息率全部是5厘以上，環球利率向下，這個息差回報看似吸引，但別忘了這是過去式，去年的息及現在的價，往日大家假設業務穩定按年加租，派息升股價自然向上，但當巨輪逆轉，租戶唔掂求減租，甚至你減畀佢，佢都決定走人，空置率上升，之後便是減派息，最終亦會反映在股價上，條數有幾差，可能要下年3月業績先知，但現時接連創新低，就是醒目資金預先price in這個影響。
相關新聞：【達觀心戰】中學校長如履薄冰（何安達）
戰友可能會話，Reits升咗咁多年，現在大漲小回啫，作為長線投資者，逢低吸納才是王道，都係嘅，假設個核心業務未變的話，理當如此，但溫馨提示返，領展早前宣佈的6,000萬股回購計劃，8、9月只用了22%便停手，對上一次出手已是9月24日，係因公司將有大動作而避嫌停買，還是覺得核心業務已受損，留子彈等低位先用，戰友自行判斷吧。
青冰
http://www.fb.com/chingbing888
